رمضان 2023.. أحمد السعدني يكشف تفاصيل شخصيته في "سره الباتع"
السعدني
كشف الفنان أحمد السعدني، تفاصيل شخصيته في مسلسل “سره الباتع”، المقرر عرضه في السباق الرمضاني المقبل 2023.
قال السعدني خلال مداخلة هاتفية في برنامج “كلمة أخيرة” المذاع عبر شاشة “ON” وتقدمه الإعلامية لميس الحديدي، إنه يقدم شخصية يدعى السلطان حامد، وكان متواجدا أثناء الحملة الفرنسية على مصر، موضحا: “السلطان حامد دا كان موجود أيام الحملة الفرنسية على مصر، وهو حاجة جديدة عليا خالص.. أنا وأحمد فهمي كنا متعاقدين على مسلسلات تانيه في رمضان لكن المشروع ده صعب أن الواحد ميعملوش، دي فرص مبتجيش كتير”.
نرشح لك: قصة مسلسل سره الباتع في رمضان 2023
أشار: “أنا كنت عايز أشتغل مع الأستاذ خالد يوسف ودي أول تجربة درامية ليه، وراجع بعد فترة كبيرة بإنتاج ضخم ورواية ليوسف إدريس ودور زي السلطان حامد، ووسط الكوكبة الكبيرة دي من النجوم، ومهما حكيت مش هقدر أوصف المجهود المبذول في العمل”.
أوضح: “أنا أغلب الناس في المسلسل أشتغلت معاهم، لكن دي أول مرة أشتغل مع الأستاذ أحمد عبد العزيز، ومستمتع بالوقوف قصاده، وخالد يوسف مخرج شاطر وعارف هو عايز يعمل إيه، وهي تجربة على ما قد هي شاقة فهي ممتعة جدا.. إن شاء الله مش هنعدي أول أسبوع في رمضان وهنكون مخلصين شغل”.
أما عن حالة والده الصحية، قال: “هو الحمد لله زي الفل، بس بيضايق من الإشاعات السخيفة اللي بتطلع دي، بس هو الزمن اللي إحنا عايشين فيه والترند، هو مستمتع بالحياة الهادية البسيطة، وبيتفرج على ماتشات كورة، ومبيتفرجعش غير على الحاجات اللي أنا بعملها، وقالي يا ابني أنت اللي لسه رابطني بالشغلانة دي”.