بعد القبض عليه.. دعاء فاروق: إبراهيم مالك عنده جنون العظمة
علقت الإعلامية دعاء فاروق، على خبر القبض على التيك توكر إبراهيم مالك، وذلك بعد تقديم عدة بلاغات ضده من مجموعة من المحامين تتهمه فيها بنشر الفسق والفجور.
كتبت “فاروق” عبر حسابها الرسمي على موقع التواصل الاجتماعي “فيس بوك“: “يا للهول من هذا التيك توكر اللي قبضوا عليه.. أنا فتحت أبص أشوف مين ده بعدما امتلأت المواقع بخبر القبض عليه، مين هو أساسا؟ عملت سيرش على اسمه لأني لا أعرفه أصلا فظهرت لي بعض تيكتوكاته شديدة اللزاجة وظهرت بعض الفيديوهات التي جمعت كل الطراش الذي يطرشه يوميا عبر قناته، بس الحقيقة مش ده موضوعنا”.
نرشح لك: القبض على التيك توكر إبراهيم مالك
أضافت: “فوجئت بكلام عبيط كثير يقوله يشوبه بعض جنون العظمة بس برضه مش ده موضوعنا خالص، المجانين كتير قوي فمش هنقف عند مجنون منهم.. إنما ما استوقفني حقا وخضني هو تلك اللايفات التي تدخل عليها بنات يتحدثن معه بمنتهى العقلانية ومكملين معاه في الحديث عادي برغم أن حفلوط أفندي هذا بيطلب منهم يرقصوله”.
أوضحت: “فالبنت منهم وهن أكثر من بنت تظهر بوشها عادي وبتتكلم معاه بحضرتك ترضاه لأختك وقال بتناقشه في مدى أحقيته في طلبه هذا ونجده يرد بلزاجته منقطعة النظير آه من حقي أنا ملك من حقي يبقى على يميني وعلى شمالي جواري بقولكم طراش، طيب يا بنات هو يتحفلط ويطرش في فيدوهاته براحته وزمانه بيتحفلط في الحجز حالا، أنتوا إيه اللي طلعكم معاه أصلا اتبسطتي بقى أن فيديوهاتك طالعة مع واحد أتحجز بتهمة نشر الفسق والفجور”.
تابعت: “لقد هالني وأرعبني وأتعبني إن بنت تطلع لايف مع أي حد كده وتصور نفسها وهي بتتكلم معاه فيطلب منها بسفالة وتطجين وقلة رباية وهطل رهيب أنها ترقص له فتكمل حديثها معاه وقال إيه بتقوله ميصحش كده وترضاها لأختك، إيه يا بنات؟ أنتوا اتهبلتوا للدرجة دي ما هذه المرحلة من اللامبالاه اللي وصلتولها؟ مش فارق معاكي سمعتك وشكلك وأهلك وقرايبك وجيرانك ودراستك وحياتك، إيه يا بنات ده؟ أنتي بتعملي حوار قدام البشرية مع واحد بيقولك قومي أرقصي لي ومكملة الحوار عادى وبتتصوري عادي”.
استطردت: “مترخصوش نفسكم يا بنات للدرجة دي متلطوش نفسكم لطه هتندمي عليها العمر كله، متجريش على الفلوس السهلة بتاعت لايفات التيك توك مع أي حد ومن غير ما يكون فيه محتوي محترم فتلاقي نفسك بتجري أهلك وراكي في المحاكم، فوقي منك ليها المكسب المادي ممكن تبقى فاتورتة عالية جدا مش هتقدري عليها وهتخسري كل حاجة فلوس وسمعة ومستقبل، الله يحرق النت علي النتيت”.
في نفس السياق ألقت الأجهزة الأمنية القبض على التيك توكر إبراهيم مالك، وذلك بعد تقديم عدة بلاغات ضده من مجموعة من المحامين تتهمه فيها بنشر الفسق والفجور.
تداول عدد من مستخدمي مواقع التواصل الاجتماعي مقطع فيديو يظهر فيه إبراهيم مالك، خلال ترحيله.
اشتهر إبراهيم المالك بجملة “عازب لسة متجوزش مين ترضى بيه؟.. لو كانت عروستي في آخر العالم سأذهب إليها على جواد أبيض كالشمس.. عروستي هعبر عشانك البحار والمحيطات والكون بأكمله على حصان أبيض وأجيلك”. واشتهر بفيديوهات يبحث فيها عن عروس ظنها البعض في البداية فيديوهات ساخرة.
كما تعرض إبراهيم مالك لهجوم شديد بسبب ظهوره في فيديوهات على طريقة البث المباشر مع فتيات يطلب خلالها منهن الرقص، بالإضافة إلى إهانته للفلاحين.