محسن محيي الدين يروي قصة حجاب واعتزال زوجته نسرين

محسن محيي الدين

شدوى ممدوح

قال الفنان محسن محيي الدين، إنه سعد جدا عند اتخاذ زوجته نسرين قرار ارتداء الحجاب، مشيرا إلى أنهم لم يأخذوا برأي أي شيخ حول هذا الموضوع وحتى لم يذهبوا إلى الشيخ الشعراوي.

أضاف “محيي الدين“ خلال لقائه مع الإعلامية لميس الحديدي، في برنامج “كلمة أخيرة“، المذاع عبر قناة “cbc“: “كنا في حفلة عيد ميلاد شيريهان وكانت لسه متجوزة علاء الفاسي وكل الفنانين حضروا الحفلة، واستوقفنا إن الناس اللي موجودة عمالة بتنتف في فروة شيريهان فنسرين بصتلي وقالتلي ايه ده؟ يعني شيريهان عزماهم ومكلفة وعاملة حفلة حب، وسألتني إحنا زي الناس دي؟ قولتلها لا فقالتلي يلا قوم“.

نرشح لك: محسن محي الدين: الفن دلوقتي بقى تجارة

تابع: “قالتلي أنا مش عايزة الزيف ده، أنا عايزة أتحجب فقولتلها ياريت، وسبحان الله أول ما واحدة مشهورة تقول أنا هقف الفرق كلها بتجري عليها، وكلهم حاولوا معانا زي البرهانية والشاذلية والصوفية والإخوان لأن محدش فيهم قالنا حاجة وإحنا اللي أخدنا القرار وقفلنا الباب ده لأننا عارفين حديث إن كل ما يكون في فرق كل ما الدين ضاع“.

أردف أن تلك الفرق تأخذ جزء من المنهج وتجعله منهجا خاص بها دون بقيته، لافتا إلى أنه قرر هو وزوجته أن يبحثوا عن الدين بأنفسهم، مشيرا: “قعدنا نقرا ونفهم ونعرف واكتشفنا حاجات كتير جدا، وماكنش في مساعدة من أي حد خالص وربنا سبحانه وتعالى بيقول: (والذين جاهدوا فينا لنهدينهم سُبلنا)، جاهدوا فينا معناها اللي بيحاول يتعرف على ربنا مقالش إن فلان هو اللي هيهدي ومقالش سبيل واحد قال سُبلنا“.

استطرد “محيي الدين“: “إحنا قفلنا على نفسنا ونسرين حفظت القرآن وقعدنا نقرا الأحاديث ونعرف في الفقه ونعرف إيه المطلوب مننا بظبط وإيه، إحنا فاهمين الدين غلط فاهمين إنه صلاة وصوم الموضوع مش كده خالص إحنا بنمتحن إمتحان أساسي وهو العدل هي دي الأمانة اللي ربنا نزلها علينا وإحنا قبلناها كبشر“.

أضاف أن الله تعالى قال: “إنا عرضنا الأمانة على السماوات والأرض والجبال فأبين أن يحملنها وأشفقن منها وحملها الإنسان إنه كان ظلوما جهولا“، لافتا: “عكس الجهل، العلم وعكس الظلم، العدل يبقى إحنا نازلين نتعلم إزاي نعدل زي في المواريث ومعاملة العدو والمجتمع لازم نعمل حاجات معينة عشان كده قالوا إن النبي صلى الله عليه وسلم ماسبلناش حاجة إلا وعلمهلنا“.

تابع أن زوجته قد تركت العمل في مجال الفن بينما هو استمر فيه، ولكنه عمل في أفلام الكرتون، لافتا: “كان في هدف إني أعلم الأطفال الأخلاق والمسؤولية واحترام المواعيد وكان وقتها برامج الأطفال وقفت والحاجات دي مابقتش تتقدم في التلفزيون وبدأنا نستورد كارتون أجنبي بمفاهيم مش مظبوطة ولقيت ابني بيتفرج عليها وقولت إنهم بيحطوا السم في العسل زي دلوقتي فبدأت أكتب حاجات للأطفال“.