شاشة

ملك زاهر عن دورها في فيلم “فارس”: “شخصية عادية”

محمد هيثم

قالت الفنانة ملك أحمد زاهر، إنها عندما قرأت سيناريو شخصية “سماح” في فيلم “فارس” وجدتها شخصية عادية، ولكن ما جذبها للشخصية هي مساحة الدور الكبيرة.

أضافت “زاهر” خلال حوارها في برنامج “MBC TRENDING”: “قعدت مع ماما وبابا وحاولنا نشوف الشخصية تيجي منين فجيبناها من الحتة اللي هي ظهرت فيها في الفيلم.. شوية بسيطة شوية بتهب منها فجأة، وعملت فيها مجهود كويس وتعبت عليها”.

نرشح لك: سبب إهداء أحمد زاهر فيلم “فارس” للراحل نور الشريف

أوضحت: “أنا كنت قاعدة جوا السينما والناس حواليا وكده الموضوع كان حقيقي والناس بتضحك ومبسوطة وبتقول لي أنتي بجد هايلة وحلوة أعملي كوميدي”.

واصلت: “إحنا في التصوير مبنتعاملش أب وبنته وكده، بس أنا حاسة أني في البيت، وبابا تعامله مع الناس حلو أوي، ومفيش أنا البطل والكلام ده، وبيعمل كل حاجة، وبيوجهني ويساعدني والشغل معاه مريح جدا”.

أشارت: “ماما وبابا دايما بيقولوا لازم تبقي طبيعية عشان توصلي للناس، لأن اللي بيطلع منك وأنتي حساه بيوصل للناس أوي.. وأظن أن طاقة الممثل مبتخلصش متجددة يعني بابا بقتله 20 سنة بيمثل عمري ما شوفته بيعمل حاجة شبه التانية”.

أردفت: “الطاقة بتتجدد طول ما أنتي واثقة في موهبتك وعارفة إنك عندك موهبة مش مجرد التمثيل للتمثيل، وأنا على الأقل بجتهد واشتغل على حاجتي كويس أوي، والناس اللي بتقول أني موهبة”.

يذكر أن فيلم “فارس” بطولة أحمد زاهر، وحسين فهمي، وإيمان العاصي، نهال عنبر، أحمد صفوت، ملك أحمد زاهر، وعابد عنان، واللبنانية باميلا الكيك، وضيف الشرف صلاح عبد الله، وتدور أحداث الفيلم في إطار اجتماعي أكشن تشويقي، تأليف حسام موسى، وإنتاج أيمن يوسف، وإخراج رؤوف عبد العزيز.

أنت تستخدم إضافة Adblock

برجاء دعمنا عن طريق تعطيل إضافة Adblock