هند صبري: أشبع الجانب الروحي بالتعبد والتأمل
كشفت الفنانة هند صبري الكثير من جوانب حياتها، خلال لقائها مع إيناس سلامة الشواف على راديو إنرجي ٩٢.١ ببرنامج “اتنين..اتنين”.
قالت هند إن الفشل والنجاح لهما حكمة دوما، موضحة أنها لا تفرح بشدة حال نجاحها، قائلة: “مش هنعرف طعم النجاح بدون تجربة الفشل ودايما بيكون لحكمة، ومش بفرح أوي بنجاحي ودايما بفكر نفسي إن النجاح بيجي بعد تعب كتير فالإحساس بيكون ممزوج بالمسؤولية وأصحابي بيقولولي انتي نكدية”.
نرشح لك: إسلام إبراهيم باكيا: “أبويا في العناية المركزة على طول”
تابعت: “الخوف من الآخرين بيولد فينا شعور ممكن نفسره بأنه كراهية.. وفلسفتي في الحياة إني ميكونش في أحكام مسبقة على حد وأقدم المحبة عشان ألاقيها في المقابل والطريقة دي حققت نتائج ترضيني”.
وعن ثنائية الأمان والخوف، قالت: “الأمان والخوف ثنائية لكن هي نفسها الحب والخوف لأن سبب الأمان هو وجود المحبة.. عمرك ما هتخاف في مكان فيه حب.. أما ثنائية الحضور والغياب فمهمة جدا في مهنتنا لأن الغياب كتير مقلق والحضور بكثرة غلط لازم توازن بينهم وده صعب في زمن السوشيال ميديا”.
تضيف: “الصحة والمرض أهميتها وضحت أكتر بعد أزمة كورونا وبقيت أقدر نعمة الصحة وأسيبها على الله لأن التفكير فيها كتير يسبب خوف وده بيأثر على المناعة وبيعرضنا للمرض”.
وعن النقد والمدح، صرحت قائلة: “في مهنتنا مهمة جدا ثنائية النقد والمدح بس مش بتأثر بيهم.. ولو الفنان شاف قيمته الفنية مرتبطة بالمدح والجوايز هيبقى طول عمره أسير ليهم، مش بشكر ناقد مدح فيا لأنها مش علاقة شخصية.. هو بيؤدي عمله وأما بقابلهم بقولهم كده وبيتفهموا ده.. ونفس الشيء، مش بكلم اللي رفض شغلي ومبزعلش”.
أضافت هند صبري أنها شخص إيجابي لكنها لا تحب التسلية، قائلة: “أنا شخص إيجابي لو أقدر أعمل حاجة هعملها.. وبحاول في مجالات مختلفة زي الحفاظ على البيئة أو دعم برنامج التغذية العالمي”.
على صعيد آخر، أوضحت هند أن الجانب الروحى مهم للغاية، وأنها تقوم بإشباعه بالتعبد والتأمل والقراءة عن العوالم المختلفة والطب الهندي القديم”. وعن ثنائية الخير والشر، قالت: “الخير والشر موجودين فينا كلنا وأهم ثنائية في الدراما.. الثنائية دي اختيار شخصي تحب تنمى إيه وإزاي تواجه أي نزعة شر بداخلك وتجاهد نفسك”.
تدور فكرة برنامج “اثنين اثنين” حول البحث عن الشيء وعكسه داخل مشوار كل فنان، متى شعر بالنجاح ومتى شعر بالفشل، ما هو الموقف الذي أعطى له الأمل، وما الذي تسبب له في الشعور باليأس. يعرض البرنامج من الأحد للخميس في تمام الساعة الثامنة مساء على راديو إنرجي.