حسن الرداد لمنتقديه: فيه حد ميحبش يعيش في السعودية؟
علق الفنان حسن الرداد على الانتقادات التي وجهت له بسبب التصريح المنسوب إليه حول أمنيته بالعيش في السعودية لأنها ملتقى الفن، على هامش حفل حفل الـ Joy Awards.
قال “الرداد” خلال مداخلة هاتفية لبرنامج “الحكاية” المذاع على شاشة mbc مصر ويقدمه الإعلامي عمرو أديب: “امبارح أنا كنت بحضر حفل عالمي، حفل الـ Joy Awards وكان على أعلى مستوى وأنا داخل بسجل مع المذيع الجميل مهند بخيت، وأنا داخل كان فيه جمهور سعودي كبير واقف من شباب وبنات وأول ما شافوني قعدوا يصرخوا ويهيصوا ويشاوروا ويندهولي”.
نرشح لك: حسن الرداد يفسر سبب انتشار شائعة انفصاله عن إيمي
تابع: “فروحت اتصورت معاهم، وسلمت عليهم بعدين روحت اعمل الحديث بتاعي فمهند بيسألني أنت أول ما جيت الناس فضلت تسقف وتهيص والجو كان برد، فقولتله أنا مش عايز امشي من هنا، الناس جميلة ودفا الناس واستقبال الناس وحب الناس مخلي الواحد مش حاسس بالبرد والساقعة اللي كانت موجودة”.
أضاف: “وبعد كده كملنا الحوار مع بعض وعبرت أثناء الحوار عن إعجابي بالنهضة السعودية اللي حاصلة اللي شايفنها كلنا في السعودية في الفترة الأخيرة وبس بعد كده دخلت الحفلة رائعة وفيها نجوم عالميين، والواحد فعلا كان قاعد في بلده، استقبال رائع وفظيع وتكريم وتقدير كبير للفنان المصري وللشخصية المصرية وعرفان بالجميل أو عرفان بالمشوار الكبير اللي قدمه الفنان المصري على مدار عقود كبيرة جدا تمثل امبارح في التكريم الكبير للراحل حمايا العزيز سمير غانم والأستاذة دلال عبد العزيز الله يرحمهم، وقد إيه كان فيه مشاعر وتقدير ليهم”.
أردف: “الفنان والفنانة اللي كانوا بيتكرموا امبارح كانوا مصريين والوقوف والتصفيق كان لفنانين مصريين وكل ده عبارة عن حب وتأثير من الفنان المصري الشعب السعودي، علاقة الشعب السعودي بالمصري قوية على كل المستويات فعيب إن الناس تتكلم بنوايا خبيثة وتعمل تفرقة ما بين المصري والسعودي”.
استطرد أنه ذهب عدة مرات إلى السعودية لأداء لعمرة والحج ثم المشاركة في موسم الترفيه، مضيفا: “الدفا والمعاملة اللي الواحد شافها في السعودية غير طبيعية أنا فنان مصري عربي بعمل أفلام ومسرحيات بتتعرض في السعودية وفي أي دولة عربية وبتشرف إن أفلامي بتتعرض في الدول العربية وفي السعودية وسعيد وأحب أعيش في السعودية زي ما أحب أعيش في مصر”.
واصل: “وايه المشكلة إن الواحد يقول أحب أعيش في السعودية، فيه حد ميحبش يعيش في السعودية؟ ده بلد جميلة زي ما ناس كتيرة تحب تعيش في مصر، مش فاهم إيه المشكلة يعني الواحد بقى لو كان قال مثلا أنا عايز أعيش في بلد بقى معادية لمصر أو عايزة تدمر مصر كان بقى الناس إيه تفرح؟ السعودية البلد الجميلة اللي فيها المسجد النبوي والحرم المكي ومحتضنانا كلنا، معرفش الناس زعلانة ليه كده”.