هل تشارك نيللي كريم زوجها في عمل فني؟ الفنانة تُجيب

قالت الفنانة نيللي كريم، إنها تحاول الوصول للتوازن في علاقتها مع زوجها لاعب الأسكواش السابق هشام عاشور.

أضافت “كريم” خلال لقاء مع “ET بالعربي“: “بحاول أوصل للتوازن بعد فشل مرتين، ومحدش عارف بكرة في إيه.. فبحاول كل يوم يبقى حلو وفي طاقة إيجابية ومغامرات جديدة فيها حاجات حلوة وحاجات وحشة، بس على الأقل آخر اليوم ينتهي بشكل كويس”.

نرشح لك: نيللي كريم تدعم شيرين عبد الوهاب في أزمة الطلاق

وعن مسلسل “الجسر”، قالت إنه عمل مفاجئ مع مخرج تحبه وهو بيتر ميمي، وعن تعاونها مع عمرو سعد في المسلسل، قالت: “أول مرة أشتغل مع عمرو سعد، وحصلي الشرف إننا اشتغلنا مع بعض، فنان رائع، إنسان، من أمتع الأيام لما كنت بصور الجسر لما عمرو بيبقى موجود، لأنه غير أنه ممثل رائع فيه بينا كلام كتير.. كنا بنقعد نتناقش في مواضيع مختلفة، فكره فني قوي بيحب الكتابة والقراية، فكان عمل ممتع على جميع المستويات”.

وعن مسلسل “أحوال شخصية” الذي تنافس من خلاله في رمضان 2022، قالت: “عايزة أكلم الجمهور، لأن واضح إن الصحافة بتسبق الأحداث، أنا لسه مقريتش الإسكريبت للآخر فمعرفش هبكيكوا ولا هضحكوا الحقيقة يعني.. وأنا موحشتنيش الأدوار التقيلة عايزة أضحك شوية وأعتقد كلنا محتاجين طاقة إيجابية وحاجة تحسسنا إن الحياة حلوة”.

وعن الجزء الثاني من مسلسل “100 وش”، قالت: “الأستاذ جمال العدل بيحضر، لكن معرفش هنعمله أمتى، فمش عايزة أسبق الأحداث”.

وفيما يتعلق بمشاركة هشام عاشور في رمضان 2022، قالت: “هشام هيمثل لكن مش معايا، مع ريهام حجاج.. والسنة اللي فاتت كان مع مدام يسرا، وقبل ما ينزل مصر كان بيعمل حاجات في أمريكا وعامل وكالة هناك برا.. ولما أتجوزنا الناس اللي مش متابعينه مفكرين أنه بدأ دلوقت لكنه بادئ من زمان.. ولحد الآن متفقين أننا مش هنمثل مع بعض، وكل شيء جايز ولما يجي الدور المناسب ممكن ساعتها نفكر”.