هل يمكن تقسيط المصروفات المدرسية؟.. وزير التعليم يجيب

بسملة سعودي
تقسيط المصروفات المدرسية

تحدث الدكتور طارق شوقي وزير التربية والتعليم والبحث الفني، عن العديد من التفاصيل الهامة الخاصة بمصروفات المدارس، وحوكمة جميع المدارس ذات المصروفات المرتفعة، ووجود إدارة مركزية بالوزارة مسئولة عن جميع أمور المصروفات.

قال “شوقي”، خلال مداخلة هاتفية له ببرنامج “الحكاية” مع الإعلامي عمرو أديب، على شاشة “mbc مصر“، أن هناك الشكاوى التي تقدم من أولياء الأمور بخصوص زيادة المصروفات قائلا: “الوزارة لما بيجلها شكوى من زيادة المصاريف مخالفة للي قولنا عليه بنعمل عليها إشراف إداري ومالي كامل وبنتلافى ده كله، في عدد كبير من المدارس مثلا 12 ألف مدرسة ومحتاجين نحوكم هذا الموضوع وننهيه”.

نرشح لك: “التعليم” تنفي تأجيل موعد بدء العام الدراسي بسبب كورونا

تابع: “لما تحب تعاقب مدرسة مش هتقدر تقف لها لإنك لما تقف لها الطلبة جوة المدرسة، هو واخد رهينة فمش هتعرف تقفله المدرسة، هنعمله عقوبات مالية كبيرة جدا، والترخيص هنعمله قواعد بس هنعلنها في حينها”.

 

استكمل: “بنحاول إلى الآن التعامل بالطرق المألوفة، وإحنا هنعمل رابط، الناس هتاخده، ويكون في مكان لإيداع هذه الشكاوي والرد عليها كل على حدى، عشان يبقى في مكان لصوتهم غير السوشيال ميديا والتريندات وغير الاستغاثات”.

تابع حديثه عن هذا النظام: “النظام مقنن لاستقبال والرد على الشكاوى وبنشتغل عليه حاليا، هيطلع كمان أسبوعين بالكتير”.

فيما أبدى اعتراضه على اقتراح أولياء الأمور لدفع المصروفات بالتقسيط قائلا: “الحديث ده متكرر وجاء الوقت إن إحنا نتوقف عنه، مش معقول كل عام دراسي هنسأل نفس الأسئلة ونتكلم على الأتوبيس والزي المدرسي”.

تابع: “اللي عايز يدخل ولاده مدرسة حكومية يدخل مدرسة حكومية، بس ميدخلش مدرسة خاصة ويبوظها لإن المدرسة الخاصة كمان ليها مصاريف، لأننا مشروع استثماري فمينفعش إن إحنا نقول حاجة زي كدة من اتجاه واحد، الاتجاه اللي مريحني أنا بس لأن مش كل ولي أمر هياخد قرار يريحه هو”.

وتحدث “شوقي”، عن حوكمة المدارس ذات المصروفات المرتفعة موضحا: “بنحاول نعمل حوكمة المدارس من جذورها، وهنعلن عنها قريب مش قادر أقول ميعادها لأن هناخد من 6 إلى 8 أسابيع، هتتحوكم كل ما يتعلق بالمدارس والمصروفات من حيث التعاقدات بين أولياء الأمور والمدرسة، وطريقة الدفع هتكون إلكترونية معلنة تحت إشراف الوزارة”.

تقسيط المصروفات المدرسية