مخرجة "كان لك معايا" تعاتب الصحفيين بسبب منة جلال وأسامة أسعد
شاركت المخرجة روجينا بسالي، الجمهور بمنشور أعربت من خلاله عن استيائها الشديد لتجاهل بعض الصحفيين ذكر اسم كل من الفنانين منة جلال، وأسامة أسعد.
كتبت “بسالي” في المنشور الذي طرحته عبر حسابها الشخصي على موقع “فيس بوك” الآتي: “أنا من أول فيلم قصير عملته لغاية الفيلم الأخير (كان لك معايا) عادة ما بقولش فيلمي وبقول (فيلمنا) احترامًا لمجهود كل الناس اللي بتشتغل معايا ولأن مفيش عمل فني بيطلع بشخص واحد، مع إني من أنصار ومؤيدي (العمل ينسب لمخرجه)”.
نرشح لك: بسبب فيديو.. شيرين لـ فتاة كفيفة: أخدت منك طاقة حلوة
تابعت: “فأعتقد إن ما يصحش بعض وبأكد بعض السادة الصحفيين يتجاهلوا اسم اتنين من أبطال الفيلم عشان حضراتكم عندكم وهم وعقدة اسمها النجم اللي بيعمل لحضرتك ترافيك.. فيلمنا له أربع أبطال منهم اتنين شباب هايلين وشايلين الفيلم وده مش كلامي ده بشهادة كل اللي اتفرج والاتنين دول أسمائهم منة جلال وأسامة أسعد”.
أضافت: ” منة صممت تعمل الفساتين اللي كنت شايفها في خيالي على حسابها عشان ميزانية الفيلم كانت لا تسمح ورفضت تمامًا أشارك معاها ولو بجزء صغير حتى، أسامة كان بيدفع لمساعدينه من جيبه، الاتنين دول ساعدوني ووقفوا جنبي وما سمعتش صوت حد فيهم في التصوير ولا حد كان بيقولي تعبت ولا كنت بشوف حد فيهم بيشتكي، الاتنين دول طول الوقت ورغم تعبهم وتوترتي وعصبيتي كانوا مبتسمين ولطاف مع الكل، الاتنين دول شطار وبيحبوا شغلهم بجد”.
أردفت: “لذلك أنا برفض تمامًا إن يبخس حقهم ومش حاسمح لأي حد يضيع مجهوده أو ينكره، مش هتعامل مع أي صحفي أو أي حد عايز يعمل شو فاضي ومش هقبل أي ندوة أو أي برنامج بدون وجودهم ومن قبلي كمان.. أخيرًا شكرًا للمرة المليون للفنان الكبير الأستاذ محمود قابيل، على دعمك ومحبتك اللي كانوا بصدق وبدون أي شروط”.
اختتمت: ” شكرًا لتعبك وحرصك وقلبك اللي كان على الفيلم، شكرًا لاهتمامك إنك تبين مجهود الشباب ديه وتديهم حقهم، شكرًا على أجرك اللي اتنازلت عنه دعمًا لينا، شكرًا على الكواليس اللطيفة والروح الحلوة طول الوقت أصلها أشياء لا تشترى يا أستاذ والله.. ألف شكر لك”.