هالة صدقي عن طلبها في بيت الطاعة: مفيش طاعة ولا طلاق عند المسيحيين

علقت الفنانة هالة صدقي على تلقيها إنذارًا بالطاعة من زوجها، وقالت: “الراجل بينفرد بقضايا متنوعة مختلفة، يعني عنده الإبداع ده، والحقيقة كل القضايا اللي رفعها، هو مكسبش ولا قضية”.

تابعت “صدقي” خلال مداخلة هاتفية مع برنامج “كلمة أخيرة” المذاع على شاشة ON وتقدمه الإعلامية لميس الحديدي: “هو نزل النفقة النص بتاعة مدرسة الولاد، لكن هو بيبدع، ومرة يشكرني ومرة يشتمني، ومرة يبعت رسايل يتأسف ويقول أنا هبقى كويس، وتاني يوم تلاقيني بتشتم مش عارفة ليه”.

نرشح لك: آمال ماهر تعلن فسخ خطوبتها

استكملت: “ممكن عنده علاقات كتيرة وكل واحد بينصحه بنصيحة، لكن أنا الحقيقة ست ملتزمة، أنا في الطاعة بتاعتي تمام أنا ملتزمة جدا على فكرة، بس إحنا اتجوزنا في بيتي في شقتي وخلفت في شقتي، فهو فين الشقة؟ هو طبعا قالب الأحداث، كاتب إن شقة الزوجية على عنوان أبوه، الحقيقة إن هو كل عناوينه على عنوان بيتي، بس أنا معاه وملتزمة بس فين الجثة؟ يعني هو في أمريكا، ولا أنا هروح أقعد لوحدي ولا إيه مش فاهمة؟”.

أردفت: “أساسا عند المسيحيين لا فيه طاعة ولا فيه طلاق، لكن هو عايز يعمل شو إعلامي، وأنا هساعده في ده، يعني هو لسه باعت إن الولاد يطلعوا من المدرسة ويروحوا مدرسة حكومة”.

اختتمت: “قال أنا مش مانع ولادي من السفر وهو لحد النهاردة عاملهم منع سفر ورافض يجددلهم الباسبور الأمريكي، بيستعمل كل الوسائل للضغط عليا، هو زودها قوي والأطفال اللي بيدفعوا التمن”.