خبر

لميس الحديدي تكشف تفاصيل حادثة عمرو أديب وتوجه الشكر لأربعة شباب

طمأنت الإعلامية لميس الحديدي الجمهور على الحالة الصحية للإعلامي عمرو أديب بعد تعرضه لحادث مروري مساء الثلاثاء الماضي.

قالت “الحديدي” عبر برنامجها “كلمة أخيرة” المذاع على قناة “ON”، اليوم السبت: “عاوزة أتكلم في موضوع مالوش علاقه بالشغل، عاوزة أطمن كل الناس اللي بتسأل على عمرو بعد الحادثه الصعبة اللي تعرض لها مساء الثلاثاء الماضي، أنه الحمد لله بخير بشكل عام ربنا نجاه بأعجوبة الحقيقة لأن العربية اللي خبط فيها واللي وقفت فجأة، كانت محملة بأنابيب بوتاجاز فكان ممكن تنفجر في أي لحظة”.

نرشح لك: فيديو من موقع حادث عمرو أديب

تابعت: “الدكاترة طمنونا على حالته عموما، لكن هو لسه بيعاني من آلام مبرحة غالبا من الكدمات والرضوض نتوقع إنها تاخد بعض الوقت، وإن شاء الله يحاول يرجع لجمهوره قريبا بإذن الله، لكن هو محتاج يستريح شوية علشان يقدر يرجع تاني، وأنا طبعا مكنتش هقدر أنزل الشغل أو أكون معاكم إلا وأنا مطمئنة عليه إنه بيتماثل للشفاء وإن حالته تسمح إني اسيبه بعض الوقت، لأن في مثل هذه الأحداث دوري كزوجة بييجي قبل دوري كإعلامية “.

وجهت الشكر للجمهور ولكافة المسؤولين في الدولة قائلة: “عاوزة أشكر كل الناس اللي سألوا علينا وعليه من أصغر حد لأكبر حد، من الجمهور البسيط اللي كان بيبعتلي رسائل ودعوات وشمع في الكنائس، لأكبر مسئولين في البلد بشكرهم جميعا، زملاءنا الإعلاميين، الفنانين من كل الوطن العربي، الدكاترة اللي كانوا بيكلموني، مستشفى دار الفؤاد اللي أنقذت عمرو في اللحظات الأولى، ألفا سكان اللي دايما في ضهرنا، وطبعا أصدقائي وأصدقاء عمرو اللي ماسابونيش لحظة واحدة باعتذر إني ماكنتش بارد علي الاتصالات، لكن ممتنين جدا لاهتمامهم، وحبهم اللي حسينا بيه”.

كشفت لميس الحديدي لأول مرة عن هوية أربعة شباب كان لهم دورًا كبيرّا في إنقاذ زوجها الإعلامي عمرو أديب للمستشفى وإنقاذه، قائلة: “أنا هنا سأخص بالشكر ٤ شباب بالاسم لأنهم هم دول اللي نقلوا عمرو المستشفى بعد الحادث مباشرة وفضلوا معاه لحد ما أنا وصلت مباشرة بعد الحلقة يوم الثلاثاء، المهندس مصطفى عزب، الدكتور كريم النحاس، دكتور طارق سلامة، المهندسة داليدا، الشباب دول أنا ماعرفهومش، لكنهم تصادف وجودهم في نفس مكان الحادث ونقلوه المستشفى وفضلوا معاه لحد وصولي وكملوا معايا لحد ما اتطمنوا عليه، الشباب دول أنا صممت أخد أساميهم علشان اشكرهم بنفسي، فيه لسه ناس محترمه بجد”.

يذكر أن برنامج “كلمة أخيرة” تقديم الإعلامية لميس الحديدي ويذاع من السبت إلى الثلاثاء في تمام التاسعة على شاشة “ON”.

كاتب

إعلام دوت كوم صوت الميديا العربية

أنت تستخدم إضافة Adblock

برجاء دعمنا عن طريق تعطيل إضافة Adblock