كيف أحيت ابنة إبراهيم يسري ذكرى وفاة والدها؟
أحيت هنا إبراهيم يسري، ابنة الفنان الراحل إبراهيم يسري، ذكرى وفاة والدها، بالحديث عن كم الألم الذي تشعر به بسبب افتقادها الشديد له.ابنة إبراهيم يسري
نشرت “يسري” عبر حسابها الشخصي على موقع تبادل الصور “إنستجرام” صورة والدها، وعلقت عليها كاتبة: “٤ سنين.. في نفس الوقت ده بالظبط من ٤ سنين، صحيت على خبر غيرلي حياتي كلها، و من ساعتها و الحياة عمرها ما رجعت زي الأول ولا عمرها هترجع، أنا بقالي أسبوع مراهنة نفسي إني مش هحط صور ولا أكتب حاجة ولا حتى أفكر في الموضوع بس خسرت الرهان كالعادة”.
تابعت: “اااااااااه.. وحشتني أوي يا هيما، أوي أوي، الحياة من غيرك صعبة، صعبة أوي، عمري ماعرفت ولا فهمت معنى الوحشة دي غير لما سبتني، عمري ما فهمت معني الابتسامة التي فيها وجع غير بعدك، وحشتني ضحكتك الحلوة بزيادة، وحشني حضنك، وحشني حنيتك عليا، وحشني سؤالك عليا ودلعك ليا، وحشني حسك في البيت، وحشني إني أروح وأدخل عليك وأتكلم معاك، ساعات بكون ماشية في مكان كنا بنروحه كتير مع بعض أو أشم رحتك في مكان فجأة، فجأة بحس إن قلبي اتعسر، من كام يوم حلمت بيك نفس الحلم اللي بحلمه علي طول أنك بتقولي أنا لسه موجود يا نونو بس المرة دي الحلم كان حقيقي بزيادة لدرجة إني صحيت ببص حواليا عشان افتكرت إنك موجود بجد”.
أردفت: “أنا مبقتش أنا من ساعة ما سبتني يا بابي، الوجع هدني، وكبرني الـ 3 سنين اللي فاتوا مكنتش عارفة ولا قادرة أرجع لحياتي الحرفية وقفت من بعدك، مؤخرا بس بدأت أكون أحسن، عارف ليه؟ عشان شيفاك وأنت بتقولي.. أنتي عبيطة يا نونو؟ بتعيطي ليه يا حبيبتي، فـ كل ما أجي أعيط، أفتكرك وأضحك و أبطل عياط عشان والله العظيم أنت لسة معايا، أنا كل ما بفرح أو يحصل حاجة جديدة في حياتي، بجري عليك أحكيلك، كل لحظة أنت في بالي و لسه بشارك معاك كل حاجة ويمكن أكتر كمان”.
تابعت: “اللي مصبرني حب الناس الزيادة ما شاء الله ليك يا بابي، أنا في ناس بتحبني من غير ما يعرفوني لمجرد إن أنا بنتك، والله كمية الكلام الحلو اللي بيتقال عليك وكمية حب الناس ليك مش عادي، من جوة ومن بره الوسط، يا رب تبقى عارف وحاسس، كل يوم بعرف عنك حكايات تخليني فخورة أكتر وأكتر إني بنتك أنت مش بنت أي حد تاني، أنا راسي مرفوعة بسببك لفوق أوي يا بابي، أشوفك علي خير يا حبيب قلبي ونور عيني”.