مارينا المصري تكتب: دراما كوين (12)

كل سنة وانتم طيبين، رمضان كريم، وفي “دراما كوين” هجيبلكم كل يوم أبرز المقولات اللي سمعت في ودني، من كل مسلسل، واللي شايفة إن بعضها هيعيش معانا سنين قدام، وتعليقي عليها، وحقيقي تسلم إيد السيناريست.

نرشح لك: مارينا المصري تكتب: دراما كوين (11)

أبو عمر المصري

– “العند في الغلط بيودي في داهية يا عمر“.

(وياترى اللي بيعند بيبقى مش شايف الغلط ولا حابه ولا مش قادر يعمل الصح أو مش عارف إيه هو الصح؟ ساعات عمل الغلط بيكون اختيار صح!!)

– هو مفروض القائد لا يقلق؟

* لا بس مفروض يكون أكتر واحد واثق.

(لإن الثقة معناها رؤية الهدف بوضوح)

– “كل حتة وليها توبها”

(توبها مش وشها)

–بقولك بحبك

– وانا لسة بحاول اكرهك يا فخر

(ساعات كلمة بحبك بتتقال من الستات بأصعب الكلمات مش عارفة لإنه خوف ولا كبرياء ولا صراحة)

بالحجم العائلي

–وحشتيني

-وانت موحشتنيش

(لسة بقولكم إيه فوق.. أهي برضه قالتله موحشتنيش)

– “عيال اليومين دول ما يضحكش عليهم”

(هما دول عيال!! دول أكبر وأنصح مني)

– “أقولك سر.. الرجالة كلهم هبل”

(لا ما احنا عارفين والله)

-“إيه الكأبة اللي انت فيها دي؟، ما تشوفي النسوان الخواجات اللي حوالينا.. الواحدة معدية الـ 70 سنة ولابسة البيكيني و بتتنطت على البيسين”

(والله احنا الست عندنا تعدي التلاتين وتلاقي نفس اللي بيقولك الجملة دي أول واحد بيحرم وبيعيب على الست لو شمت نفسها ويعاكس وينبهر بالخواجات وشيرين رضا عادي.. أصل الست المصرية عندها مجتمع يحرم ويحلل على مزاجه ورجالة تجيب المرض ومفيش فلوس.. واه الفلوس بتنضف)

كلبش

– “أنا بحط سعر لنفسي”.

(كلنا بنحط سعر لنفسنا حتى لو مش عارفين.. في بقى اللي مرخص نفسه وفي اللي نفسه عزيزة وتمنها الحب)

أيوب

– “الطمع بيعمي”.

– “سلمت رقبتك على طبق من دهب”.

– “أنت رقم four يعني محتاجة فيسفور”.

– “البوسة دي نعكشة مشاعر عالفاضي”

– “اللي تبيع أمها وأخوها ولا ليها دية ولا تمن”.

(مفيش أرخص منها.. مش قولنا كل واحد بيحط سعر لنفسه)

رحيم

– “الحظ مبيجيش غير للي يستحقه”.

(مفيش حاجة اسمها حظ، في حاجة اسمها فرصة وبتيجي برضه للي يستحقها أو للي ليه واسطة)

نسر الصعيد

– “جوزك بس اللي معاه مفتاح زنزانتك ومفيش حد غيره هيعرف يطلعك منها”.

(هو كم الإهانة والقهر للزوجات السنة دي مش طبيعي السؤال بقى هل ده انعكاس للواقع؟)

ليالي أوجيني

– معقول في حاجة كويسة في التعب؟!

 * مش كل التعب وحش.

(مقدرش أقول الكلام الكليشيه بتاع إن الوجع والتعب بيعرفك الناس وبيقويك وبيكبرك لإنه ساعات كتير بيكسرك وبيقتل حاجة جواك مش ممكن ترجع تاني.. بس التعب لما بيشيل الغشاوة من على عنيك أو  بيفوقك او بيخليك تقرب أكتر من نفسك بيبقى تعبك ما راحش هدر)

– “الرجالة الكبار مثل الولاد الصغار، لو فضلتي متعصبة هايعندوا، بس لو صالحتيه وبكيتي وادلعتي شوية، أكيد هيغير رأيه”.

(والله عارفين)

– “كل اللي بيجي من البحر خير”.

(أكتر حاجة صح وحقيقية بجد ما عدا اللي بيجي من بحر مراسي)

– “هل تتلاقى الأرواح المعذبة، هل توجد لغة خفية بينهم، تجعل الصمت يحمل من المعاني أكثر مما يحمله الكلام، قد تجد نفسك في حديث مع أحدهم دون أن تنطق بشىء”.