عمر طاهر: بشجع اللي هينتخبوا الخطيب - E3lam.Com

بـ أشجع اللي هينتخبوا الخطيب لأسباب مالهاش علاقة بالإنجازات، والقائمة، ومحمود طاهر، وكل عك الانتخابات السخيف.
بـ أشجع اللي هينتخبوا حد ريحة اسمه شبه ريحة بيوتنا في العصاري، وهو بيلعب.

حد جاي من تواريخنا الشخصية.

عشرة، وونس، وغرام شبه الملعب اللي كان ساكت، والأهلي فايز، والماتش بيخلص، وفجأة ولع عشان واحد وقف يشاور على الممر اللي بين المدرجات، و صرخ الخطيب قلع، وبيسخن.
جاي من منطقة فرحة صاحبك الحقيقة، وهو بيقول الخطيب فك الجبس.
أنا عارف إن الانتخابات مش منطقة تحب وتكره.
بس الواحد نفسه يحب.
نفسه يتونس بحد حتى لو خربها مسامحينه.

نرشح لك: الخطيب: لم أدفع أي مقابل لمقر حملتي الانتخابية

إحنا في عرض حد الواحد يبقى مطمن لما يشوفه، وخلاص.
الأهلي، والزمالك بره الأسوار اللي انتوا عاملينها حوالين النوادي.
الأهلي، والزمالك في حتة ماحدش من كل اللي نازلين انتخابات يقدر يطولها.
بس الخطيب واحد من اللي لمسوها من زمان.
الواحد نفسه يشوف على الشاشة واحد ياما عدى في طرقة بيته.
كلنا في عرض حاجة تحرك القلب.
أحسن العملية بقت ناشفة على الآخر .