غادة رجعت بـ "CAME PACK" لينا والسوشيال اليوم في عيد - E3lam.Com
سهيلة حامد
غادة عبدالرازق رجعت يا جماعة لـ “السوشيال ميديا” انتوا مدركين يعني إيه غادة ترجع يعني “رزق” وجالنا واحنا قاعدين سايبين ايدينا بالصلاة عالنبي.. خد عندك بقى بوستات على صور على فيديوهات ولايف “وما أدراكم ما اللايف” وبوز بطة وورك فرخة و…… يا نهار يا نهار دي السهرة هتبقى صبّاحي.
نيجي بقى للأسئلة المهمة.. رجوع غادة كان إزاي… أنا لا بيا ولا عليا دخلت على أول حاجة كتبتها بعد الرجوع لاقيت ست الكل منزلة صورة جوز بنتها روتانا وكاتبة I’m back that’s my son، قلت حلو والله أهو الواد بقى من العيلة وبقى SON وبتاع، دخلت على الصورة التانية لاقيت “بوز غادة” ضارب في وشي.. مممم مش مهم أهي رجعت وبوزها رجع معاها والدنيا أمان، بضرب عيني تحت عالكلام وأنا بصقف ولسة بقول هيييييه لاقيت مكتوب: “I am Ghada Abd el razik came pack”.. بوقي اتفتح وعيني برّقت والصقفة بدأت تهدى تدريجيًا وانتهت بـ لطمة وبصوت يكاد يكون منعدم.. came pack!!.
بدأت أفوّق نفسي ولطشتني قلمين.. ليه يا غادة تقتلي الفرحة جوانا.. وبصوت “الكبير”: تاني يا غادة.. مهند تاني.. انجليزي تاني.. طب يا ستي أنا مقدرّة إنك مقدرتيش تقعدي شهر واحد وإيدك بتاكلك على “تاتش” الموبايل بس ليه تحطي “التاتش” ده في كلامك.. ليه “CAME PACK” مشفتيهاش.. طب ماحستيهاش!… وهنا يحضرني مشهد الفنّان الراحل أحمد زكي في مسرحية “العيال كبرت”: “تعالى يا عاطف إقرا الجواب لاخوك الكبير يا عاطف”.
نصيحة لوجه الله.. يا تعتزلي إجازة تاني.. يا تخلي “الأدمن” يكتب بدالك.. يا تبطلي إنجليزي يا غادة.. ارجعي كدة 3 سنين ورا، فاكرة مهرجان القاهرة السينمائي، ونطق الانجليزي ساعتها عمل لك إيه…. طب بلاش انتي نفسك باعترافاتهم أهو باعترافاتهم لما الفنّان محمد كريم “هالو.. شكرا ثانك يو” – أنا معرفش حاجة ليه والله غير كدة- حاول يستعرض لغته الانجليزية قلتيله إيه قلتيله “ما بلاش أنا في الإنجليزي”… طب ليه يا حبيبتي نكررها تاني.. ونفرّج الناس علينا تاني برضه… ليه تقفلينا.. why? WHY YOU DO THIS…. بس سيبك انتي “السوشيال اليوم في عيد” و WELCAME PACK يا غادة.
