مختارات لـ 12 شاعرا عن الحب في عيد العشاق - E3lam.Com
حتى لا تكون كل موضوعات ملف الحب في زمن الميديا عن الإعلام والإعلاميين، طلبنا من عم الشعراء الشباب “أحمد شبكة” أن يقدم لنا مختارات عن الحب لـ 12 شاعرا عرفهم الجمهور من خلال السوشيال ميديا ليكون هذا الموضوع هو الأكثر رومانسية من بين موضوعات الملف
—
كل الخلايق صور … والأصل فـ المحبوب
كل الدقايق سفر … كل اللي عدّى قلوب
على باب الكريم مكتوب
البشرى للي صبر
لمّا حبيبك عبر
إخضرّ تاني الشجر … وإتعطرت له دروب
لو ينفع ..
اقولك بالمره ..
انك حره وانا بيكي سجين
وانك احلي ف لبس الفساتين
وانك ف يومين ..
عشره وجيره
انك عمرين توهه وحيرة
وان انا ليا رغبة اخيرة
تسيبيني اسلم ميه مره ..
كل الكلام سيرتك ..
كل الحاجات صورتك
وان كنت اقدر اكون ..
انا من زمان كونتك
الحضن ده… زي الودع
قيمته تبان
من لؤلؤة ساكناه قوي
و انتي يا قلب القلب عارفه اللؤلؤة
علشان ما تتكوّن
تعوز مليون سنه
ماتسيبش فيها الحضن ده
ساكت عشان
أسباب كتيرة بتمنعك إنك تقول ..
أولّها خوفك م الفُراق
و آخرها إن مفيش حلول …
…
أنا لو مكانك كنت اقول. ..
يا اغلى م السفر بالزاد
اموت لو مرة حبك قل
واموت لومرة حبك زاد
يا تاعبة القلب بالترحال ..
بلاش يبقى الكلام دايما ..
سؤال ع الصحة والاحوال
انا كويس
مادمتي معايا
انا كويس
خليني اكون مُنصف
” انا وانتي ” يعني ” انتي ”
وبانفّض عن روحي تراب الوجع ..
اللي مغطي كياني
ممكن بقى من فضلِك
تديني الفرصة أشم ف روحِك ..
ريحة الوطن اللى واحشني ؟!
قالوا ارجعى يا صبية موج الغرام عالى
أنا قلت جرح الهوى من إيده يحلالى
لـَ اهجر أمان شطكم و اتحامى ف بحوره
و إن تهت وسط العتمة يردنى نوره
دا انا لو تفوتنى عينيه ، ما فيه جنة تهنالى
ياللي انتوا خايفين م الدفا
ياللي انتوا عارفين الطريق
العرش فوق الماء أمر
الحب يحكم كل شئ
ومهما ليل البرد طال
ضي القلوب دايما مضئ
كانت بتحضن قلبي بعنيها
و تعمل روحها فُرشة تلوّن الباهت
و أنا كان في قلبي مساحة للتلوين
عشريني لكن ضحكتي تاهت
و القلب عجّز مني في العشرين
انتي الولي
وانتي المقام
والدُف
وقت الدروشة
انتي السهر
وانتي المنام
وانتي الصباح
اللي انتشى
