أحمد شوبير لـ نجله "مصطفى": اوعى تزعل يا حبيبي
وجه الإعلامي أحمد شوبير رسالة مؤثر لنجله مصطفى شوبير حارس مرمى منتخب مصر في كأس العالم 2026، بعد مباراة مصر والأرجنتين، معبرًا عن فخره بكل ما حققه.
كتب "شوبير" عبر حسابه الرسمي على موقع التواصل الاجتماعي "فيس بوك": "أكيد سعيد وفرحان بكل ردود الفعل والاحترام الكبير لمنتخبنا الوطني، وأكيد حزين جدًا لخروجنا بفعل فاعل فاسد من المونديال".
أشار: "لكن دلوقتي هكتب مشاعر أب شاف ابنه وهو بيعافر وبيحارب وبيموت نفسه من سنين وبيواجه عقبات واتهامات علي مدى سنوات، لو كنت أنا مكانه كنت رميت الفوطة من زمان وقلت بلاها كرة من الأصل، ولكني كل يوم كنت بشوفه وهو بيصمم على تحقيق حلمه أنه يلعب كأس العالم".
تابع: "كل فترة يقولي هشرفك وهرفع راسك، ويقولي صدقني أنا مش بقول كلام وخلاص وبكرة تشوف، وطبعًا كنت بشجعه لكن للأمانه مكنتش مصدقه، لكن هو كان مصدق نفسه، وكان وما زال وراه أم بمعنى الكلمة صدقت حلمه لحد ما بقى حلمها هي، وحاربنا كلنا عشان نحقق حلمه".
أكمل: "لكن هو كان أكترنا ثقة وتركيز وإصرار والتزام واحترام، عايش حياة صعبة، احتراف بمعنى الكلمة؛ الأكل والنوم والتدريب الفردي بعيدًا عن الفريق بمواعيد منضبطة، مبيسبش حاجة للصدفة أبدًا، شغال بمبدأ ارضي ربك واعمل اللي عليك واحترم مهنتك وسيب الباقي على الله".
أضاف: "عمل اللي عليه بما يرضي الله ومستني المكافأة من المولى عز وجل، لا بيسأل على عقد ولا فلوس فقط ولا غيره، واحد عنده حلم ومصدقه وواثق إن ربنا هيحققه، وكل يوم يقولي هتعمل إيه وأنت شايفنى بلعب كأس عالم وربنا بيكرمني أنا والفريق كله؟".
أردف: "للأمانة مكنتش بعرف أقوله إيه وكنت بخاف عليه أن الحلم ميتحققش، لحد ما جه كأس العالم والحلم بقى حقيقة وكمان لقيته بيتألق وربنا بيكرمه ويوفقه، وكل ما أكلمه وأقوله هايل يا بطل، يقولي لسه معملناش حاجة بس انتوا ادعولي، أقوله هطلع أتكلم عليك النهاردة في البرنامج، يقولي لا اتكلم على الفريق وأدي للناس حقها أنا لا".
تابع: "أقوله يا بنى لازم تاخد حقك، يقولي اسمع كلامي وطبعًا بسمع كلامه لأني محبش أزعله ولا أزعل حد من ولادي أبدًا لأنكم متعرفوش قد إيه ولادي هما نقطة ضعفي.. المهم كبر الحلم وصدقناه وكلمته قبل ماتش الأرجنتين وسألته في أمل؟ رد قال لي طبعًا وهنكسب إن شاء الله، وطبعًا اتمنيت له التوفيق، وطبعًا أمه كانت قاعدة جنبي مش بتبطل دعاء ولا صلاة على أمل أزه يحقق حلمه هو ومنتخبنا".
أكمل: "لحد ماجت المباراة وحسيت إن الأمل بيقرب ويقرب ويقرب.. ولكن فجأة اتسرق الحلم بفعل فاعل فاسد، وخرجنا من كأس العالم بمؤامرة شهد بيها كل العالم، خرجنا نعم من كأس العالم ولكن دخلنا التاريخ من أوسع أبوابه، وأجبرنا الجميع على احترامنا.. وهفضل مستني لحد ما يحقق حلمه وأمله حتى لو كنت مش من أهل الدنيا، لكن اكيد هكون حاسس بيه وفرحان له".
اختتم رسالته: "اوعى تزعل يا أوفا يا حبيبي، أنت وكل نجومنا كفيتوا ووفيتوا، ومعلش بقى يا بنى هتتعب 4 سنين تاني بس في الآخر والله هتحقق كل اللي نفسك فيه لإنى عارف إصرارك كويس ومتأكد إنك هتوصل لهدفك.. يا مصطفى يا مصطفى، أنا بحبك يا مصطفى، عشان خاطرى اوعى تزعل أبدًا".