بدافع الزواج.. القبض على المتهم بمطاردة ملكة جمال مصر

كشف وزارة الداخلية ملابسات منشور مدعوم بصورة تم تداوله بمواقع التواصل الاجتماعي تضررت خلاله إحدى السيدات من قيام أحد الأشخاص يحمل جنسية إحدى الدول بمطاردتها وقيامه بأعمال بلطجة وترويعها بالقاهرة.

أوضح الحساب الرسمي لوزارة الداخلية على موقع التواصل الاجتماعي "فيس بوك" في بيان رسمي، أنه بالفحص تبين عدم ورود بلاغات فى هذا الشأن، وأمكن تحديد وضبط الشخص الظاهر بالمنشور، عامل يحمل جنسية إحدى الدول، مقيم بدائرة قسم شرطة السيدة زينب، وبمواجهته اعترف بإرتكابه الواقعة على النحو المشار إليه وعلل قيامه بذلك لرغبته فى الزواج منها. وتم اتخاذ الإجراءات القانونية.

وكانت إيرينا يسري، ملكة جمال مصر عالميًا لعام 2025-2026، قد كتبت منشورًا عبر حسابها على موقع التواصل الاجتماعي "إنستجرام"، تستغيث فيه بعد تعرضها للملاحقة من أحد الأشخاص، مشيرة إلى أن حياتها في خطر.

كتبت: "أنا حياتي في خطر.. أنا أول مرة في حياتي أكتب حاجة بالشكل ده، ودايمًا محافظة على خصوصية حياتي الشخصية، بس لما الأمر يهدد حیاتي ومستقبلي والناس المحيطين بيا فأنا مش قادرة الصراحة أسكت عنه".

تابعت: "من ساعة ما أخدت لقب ملكة جمال ودخلت أول مسلسل ليا في التمثيل وفي شخص بيكتبلي كومنتات غريبة جدًا يبان أنه مختل وفاكر إن هو (مودي) وأنا (لارا) ومصدق ده من ضمن أحداث المسلسل".

أضافت: "كنت باخد الموضوع بضحك زى أي معجب، الموضوع أتطور أنه بيعرف أنا موجودة فين ويجيلي عند المكان اللي أنا فيه ومعاه خاتم ويقولي ده خاتم جوازنا.. الموضوع يبان كوميدي وبيضحك لأي حد مستمع وممكن الموضوع ميتصدقش، إنما أنا عاملة سكرين شوت لكل كلامه واعترفاته بملاحقته ليا في الةماكن والتهديدات".

أشارت: "أنا مصوراه بموبایلي وهو قدام عربیتي وبیهددني إن أي حد يقرب مني هيقتله، لدرجة إنه اتعدى على السواق الخاص بي بالضرب وجرى لما كنا هنكلم الشرطة.. أنا معرفش بيعرف الأماكن اللي أنا فيها إزاي.. الموضوع وصل بيا أن من خوفي لما أشوفه قدامي بيغم عليا في الشارع وفي شهود وبيهرب في ثانية لما الناس تتلم مش بنلحق نوديه القسم".

أضافت: "الموضوع أتطور أكثر بما إني دكتوره في الأصل إنه بيروحلي مكان شغلي في العيادة أو العيادات اللي كنت بشتغل فيها والمستشفيات وبيخلي منظري وحش وسببلي مشاكل في مكان شغلي.. هو الأكيد إنسان مختل، هو فاكر إني بحبه وعايش قصة وهمية في عقله.. أنا مبقتش عارفة أنزل شغلیي ولا عارفة أنزل في مكان ولما بضطر أنزل ببقى خايفة جدًا.. أنا زهقت وجبت أخري".

أكملت: "الموضوع قعد شهور أنا مش عارفة أعمل إيه، وباعت لصحابي البنات أنه عايز يعرف أماكن أي حد معجب بیا أو بيحبني عشان يقتله ويضربه.. الموضرع وصل إن الناس اللي في حیاتی بقت تخاف تنزل معايا، حتى السواق ساب الشغل معايا بعد ما اتضرب".

وتوجهت إيرينا يسري ملكة جمال مصر بالشكر لوزارة الداخلية بعد إلقاء القبض عليه وكتبت: "كل الشكر والتقدير لرجال الشرطة المصرية ووزارة الداخلية على سرعة استجابتهم وتعاملهم الاحترافي".

تابعت: "في وقت قياسي وبعد يوم واحد فقط من البوست اللي نزلته قدروا يقبضوا على الشخص اللي كان بيطاردني وبيسببلي أذى نفسي وخطر حقيقي ليا وللي حواليا.. اللي حصل ده أكد لي إن في دولة بتحمينا وبتاخد حقنا بجد أيًا كانت جنسية الشخص، وإن مفيش حد فوق القانون".