نادية السيد تقترح حل لأزمة الأطفال المصابة بأمراض نادرة
اقترحت الشيف نادية السيد، طريقة لحل أزمة الأطفال المصابة بأمراض نادرة، والتي يتطلب علاجها مبالغ طائلة تفوق مقدرة الكثيرين.
كتبت "السيد" عبر صفحتها على موقع "فيسبوك": "موضوع الأطفال المصابين بأمراض نادرة دة موضوع صعب جدا نفسيا، تخيل موقف الأب أو الام لما يكتشفوا إن طفلهم مصاب بمرض نادر وعلاجه يتكلف أرقام مهولة ملايين مش في مقدرة أي حد خالص، وتعيش كابوس إن ابنك بيضيع منك وانت عارف إن في علاج وطبعا تعمل كل اللي في مقدرتك وتقعد تناشد الناس المساعدة وممكن في الآخر ربنا يوفقك زي الأطفال اللي جمعوا المبلغ أو لا".
تابعت: "كابوس حرفيا واللي تعب نفسيتي جدا ان الطفل كمان يحس إنه عالة على أهله ومبهدلهم معاه ويبدا يلوم نفسه إنه مريض وتزيد همومه هم وهو شايف أهله قلوبهم مفطورة ومش في إيديهم حاجة، أنا عندي اقتراح مش عارفة إمكانية تنفيذة.. ليه ميكونش في تأمين لأطفال المصريين ضد الحالات النادرة دي ويتم تحصيل المبلغ مع إصدار شهادات الميلاد في مصر وتستخدم الفلوس دي في العلاج وفي الدراسات الطبية والبحث العلمي لمحاولة إيجاد طريقة لعلاج الأطفال دي في مصر بأدويه مصرية والتخلص من احتكار الشركات الأجنبية واللي عنده اقتراحات تانية ياريت يكتبها".
