ياسر جلال: أنا الأقل أجرًا بين زملائي!
تحدث الفنان ياسر جلال عن تفاصيل تفعيل حق الأداء العلني، وأن المطالبة به والحصول عليه من القنوات والمنصات ترفع من شأن مصر، مشيرًا إلى أنه الأقل أجرًا بين زملائه.
قال "جلال" خلال مداخلة عبر "زوم" مع الإعلامي تامر أمين في برنامج "آخر النهار" المذاع على شاشة "النهار": "أنا مش عامل حاجة لزمايلي، حتى لو عامل حاجة ده شيء ما يعيبنيش.. أنا بعمل حاجة في المقام الأول لبلدي".
تابع: "حق الأداء العلني موجود في العالم كله وموجود في الملكية الفكرية، ومش بس خاص بالفن، خاص كمان ببراءات الاختراع".
أوضح: "اللي بياخد النصيب الأكبر من حق الأداء العلني هو المؤلف، وبعدين المخرج وبعدين الممثل.. هي حاجة ملاليم مش فلوس كتيرة يعني، لكن لما مصر تهتم بحاجة زي دي، فدي بتحط مصر في مكانة كبيرة، وهذا الحق لازم نمد إيدينا وناخده من القنوات الفضائية والمنصات".
أشار إلى أجره قائلًا: "أنا في زملاء ليا بيتباهوا بإنهم أعلى أجر في مصر.. لا أنا أقل أجر بالنسبة لزمايلي، ومش باخد 40 مليون في المسلسل، أقسم بالله باخد ربع التمن ده وأزيد منه سيكا عشان القسم، وأنا راضي لأن ده كتير".
أضاف: "أنا مبعملش إعلانات ولا أفلام وعندي مبدأ إني مبعملش برامج بفلوس ومعنديش بيزنس، فالفلوس اللي باخدها في المسلسل هي اللي بعيش عليها طول السنة".