ما علاقة عادل إمام بتولي أشرف زكي منصب نقيب الممثلين لأول مرة؟
استعاد الفنان أشرف زكي، ذكريات توليه منصب نقيب المهن التمثيلية لأول مرة، مشيرًا إلى أن الفنان الراحل يوسف شعبان هو من طالبه بذلك في بداية الأمر، والزعيم عادل إمام كان داعمًا للقرار رغم أن البعض حاولوا إقناعه بالترشح، إلا أنه رفض قطعًا.
قال "زكي" خلال حواره مع المخرج معتز التوني في حلقة جديدة من بودكاست" فضفضت أوي" المذاع عبر منصة "WATCH IT": "كان النقيب وقتها الأستاذ يوسف شعبان، وقالي: أنا مش هرشح نفسي، وعايزك أنت تبقى النقيب، وده كان الصوت الغالب والناس كانت شايفة كده، لكن خرجوا يومها من القاعدة متفقين أن الزعيم عادل إمام هو النقيب".
تابع: "أنا كراجل محب للنقابة أتمنى الزعيم يكون النقيب، وكان في تكتلات ضدي كتير وتجاوزات لكن في يوم المغرب لقيت عادل إمام بيكلمني وقالي: (أنا مش فاضي، يا بني أنت النقيب القادم، وأنا بعلن ده، وجايلك أنا وكل فرقتي) وبدأت أسترد الثقة.. ولكن لم تنتهي الحرب، وبعد ما فشلوا مع أستاذ عادل راحوا يقنعوا يوسف شعبان، لكن أنا اكتسحت الأصوات".
أكد: "يوسف شعبان من أعظم النقباء والبشر والفنانين وأعتز بالفترة اللي قعدتها معاه وإني اتعلمت منه، لكن بعض الناس لمصالح شخصية بدأت تضغط عليه وهو مكنش عايز يترشح ومعندوش الرغبة، قالي أنا أترشح، وبدأوا يجيبوا نمرته ويشتموه على إنه أنا، وأنا قولت له مستحيل، وأنا بحترمه جدا، ومكنتش أحب المشهد يبان كده.. وبعدها العلاقة كانت عظيمة هو أستاذي وصديقي وحبيبي".