بعد منح والدته الدكتوراه الفخرية.. نجيب ساويرس: "بتصرف معظم فلوسنا على أعمال الخير"
منحت الجامعة البريطانية في مصر السيدة يسرية لوزا ساويرس، والدة كل من نجيب وسميح وناصيف ساويرس، الدكتوراه الفخرية تقديرًا لجهودها في مجال التنمية البشرية والعمل الاجتماعي، ومساهماتها في دعم المبادرات الإنسانية والخيرية داخل مصر وخارجها.
شاركت الجامعة البريطانية مقطع فيديو عبر صفحتها الرسمية على موقع التواصل الاجتماعي "فيس بوك"، قالت فيه السيدة يسرية لوزا: "على المستوى الشخصي، أنا حاسّة إني ماستحقش التكريم ده، لأنّي اشتغلت مع ناس، وهُمّ الناس اللي حواليّ هما السبب في النجاح ده".
تابعت: "مقدرتش أعزم كل الناس اللي اشتغلت معاهم، لكن بجدّ ربنا حطني في مكان حواليا فيه ناس رائعة ساعدوني أحقق كل اللي كنت عايزاه.. أنا اشتغلت مع جامعي القمامة، ودلوقتي لما بيشوفوني بيقولولي: (يا ماما)".
من جانبه عبر ابنها نجيب ساويرس عن فخره بهذا التكريم، قائلا: "أنا فخور جدًا بأمي، وأي تكريم تاخده فهو عن استحقاق، لأنها ست كرست حياتها للناس دايمًا.. علاقتها بربنا قوية جدًا، وربّت تلات أولاد كويسين – من غير ما أجامِل نفسي – وهي ست متديّنة جدًا وقريبة من ربنا، ونقلت ده لينا كمان".
تابع: "طول عمرها وهي بتكافح علشان الغلابة والمحتاجين، وبتصرف معظم فلوسنا على أعمال الخير، وأنا شايف إننا محظوظين إن عندنا أم زيها، وبجد أنا مبسوط وفخور بيها جدًا".