محلات بـ لبن للمنتقدين: الزحمة تضرنا واتقوا ربنا فينا
تعرضت سلسلة محلات الألبان الشهيرة بـ لبن للانتقادات قبل أيام؛ على خلفية اتهامها بالتسبب في حريق أحد فروعها بمحطة الرمل بالإسكندرية نتج عنه حريق محل مجاور للفرع وقاعة أفراح تعلوه؛ بالإضافة إلى الانتقادات التي تعرض لها بـ لبن بسبب الزحام أمام فروعه ووصفه بأنه مقصود بهدف الترويج.
رد المسؤولون عن سلسلة فروع بـ لبن على تلك الانتقادات عبر موقع فيسبوك وصدر بيان جاء فيه:
“الحقيقة مكناش حابين نتكلم في موضوع افتعال الزحمة اللي في ناس بتتكلم عنه بس الموضوع زاد عن حده اي واحد حابب يجمع لايكات ولا مشاهدات بيعمل فيها ابو العريف ويقولك بيعملوا زحمة فا احنا هنفترض حسن النية وهنشرح الموضوع مره واحده
اولاً: مجموعة محلات بلبن مصرية ١٠٠٪ قائمة علي فكرة البيع الكتير بسعر معتدل عشان تقدر تكسب ف اي عطلة من اي نوع بتسبب خساير كبيرة للمجموعة
ثانياً: الاحصائيات بتقول اننا بنخسر فعلاً ٢٠٪ من المبيعات المحتملة بسبب الزحام (موضوع الزحمة مضر لينا مش ذو منفعة)
ثالثاً: هل ممكن الاداء يكون اسرع من كده وهل بيحصل تأخير ممكن ما يحصلش ؟
اه بيحصل بس غصب عننا اخطاء تشغيلية في بعض الاحيان تقاعس من بعض العاملين في احيان اخري وجزء اخطاء تشغيلة خارجة عن ارادتنا.
رابعاً: هل ممكن تحسين الموضوع وان الخدمة تكون افضل طبعاً ممكن بس مش بالطرق المقترحة زي تزويد عدد العاملين لان في حاجة اسمها work flow داخل المحل العاملين هيخبطوا في بعض لو العدد زاد في وقت الضغط ومش بطريقة مشيني قبل اللي قبلي اصل انا طالب رز بلبن وهو طالب بالايس كريم (ده اسلوب ممكن اتباعه في محل بيخدم عدد صغير من الناس لكن اي لخبطة في سيستم الاوردارات ممكن يسبب كارثة) لكن احنا شغالين علي حلول مع خبراء في التشغيل داخل وخارج مصر لتحسين الخدمة
خامساً: وده الاهم ده اكل عيشنا احنا واكتر من ٣٠٠٠ اسرة شغالين معانا ف اتقوا ربنا فينا وفي اي كلام بيتقال عننا عشان حتي لو عندنا اخطاء فربنا عالم اننا بنشتغل بما يرضي الله وبنجتهد علي قد ما نقدر
سادساً: كده وضحنا موقفنا تماماً وبكده مش هنسكت ل اي اتهام بالباطل بدون دليل واي اتهام من النوع ده تاني هيتم اعتبارة تشهير وسيتم اتخاذ كافة الاجراءات القانونية.
اخيرا.. ربنا عالم ان احنا بنسعى دايما لخدمتكم وراحتكم وكان لازم نوضح ده للناس اللي وقفت جنبنا سواء عملاء أو عاملين”.