القصة الكاملة للاتهامات المتبادلة بين ميار الببلاوي ووفاء مكي بشأن قضية الخادمتين

09 مايو 2023 | 05:35 مساءً

وفاء مكي
هالة أبو شامة
جدل كبير أثير في الساعات القليلة الماضية، عقب تداول العديد من الأنباء حول براءة الفنانة وفاء مكي، من التهمة المنسوبة إليها بشأن تعذيب الخادمتين مروة وهنادي، والتي حكم عليها فيها عام 2001 بالسجن 10 سنوات مع الشغل والنفاذ، وسنة لكل من والدتها ليلى الفار، والفنان أحمد البرعي، وابن خالتها سيد الفار، وطليقها أيمن الغزالي، وإلزامهم جميعهم بالتعويض المدني للفتاتين.

ميار الببلاوي تكشف سبب شعورها بالذنب بعد حبس وفاء مكي

بداية القصة جاءت بعد ظهور الفنانة والإعلامية ميار الببلاوي في لقاء تلفزيوني ببرنامج “صبايا الشمس” الذي تقدمه الإعلامية ريهام سعيد، عبر قناة الشمس، حيث قالت إنها لم تستطع أن تنام طوال الـ 22 سنة بسبب ما تعانيه من تأنيب ضمير تجاه وفاء مكي، التي تدمرت حياتها الأسرية والمهنية.

وقالت “الببلاوي” في حديثها: “مفيش مرة دخلت فيها أوضة العمليات عشان أعمل عملية قلب، كنت بدعي ربنا يمد في عمري لحد ما أقول كلمة الحق واللي يحصل يحصل.. بس انتي عارفة لما يكون عندك حاجة بس مش عارفة الطريق، وعارفة إن ممكن الكلام بتاعك ميعملش حاجة، وفي نفس الوقت جواكي صراع بيقول لأ ممكن يعمل حاجة.. بقالي 23 سنة تعبانة، بقول يا ترى لو أنا كنت عملت ده كان هيتاخد بكلامي!”.

تفاصيل الواقعة التي اعتبرتها ميار الببلاوي أنها دليل براءة وفاء مكي

تابعت: “الموضوع أصلا أنا لما اتجوزت مكنتش شاطرة أوي في البيت، فكان لازم شغالين، فكان في واحدة وقعنا فيها تنزل مع القطر معاها بنات وتوزعهم، بتجيبهم من حتة في البحيرة، لكن البنات اللي جابتهم لي اليوم ده وكان يوم قراية فاتحة أختي، وكنت بلبس ولاقيت البوابة طالقة بتقولي فلانة طالعة ومعاها بنتين، طلعت كان بنت منهم بتاكل ساندوتش حلاوة طحينية، وبنت تانية نعسانة، فكنت داخلة أجيب لها الفلوس فلاقيت بنت منهم وهي بتهرش المنديل وقع من على شعرها لاقيتها قرعة، فولت لها ايه ده، قالتلي والنبي دول اللي كانوا عند وفاء مكي، قولت لها وفاء اللي حلقت لها كده، قالتلي لأ ده البنت عندها قراع إنجليزي فوفاء حلقت لها، قولت لها عندها قراع وجايبهالي وأنا ابني عنده شهر، قالت لي دي هتستحمى، قولت لها ولا تستحمى ولا حاجة خديهم وامشي.. البنات كانوا واقفين زي القرود معندهمش أي حاجة”.

أضافت: “الشهادة اللي بقولها إن البنات جم من عند وفاء، مكانوش محروقين.. لما الست مشيت وأنا نسيت الموضوع، فجأة الدنيا اتقلبت وفاء مكي عملت تعذيب وسلخانة، ولما شوفت صور البنات قولت يا نهار أبيض ده اللي الست جابتهم، روحت على التليفون كلمت مصور صحفي عزيز عليا، وقولت له الموضوع ده غلط، وفاء معملتش لهم حاجة، دول نزلوا من عندها على عندي على البلد، قالي ميار أنا عايز أقولك الموضوع ده أكبر مني ومنك، الموضوع ده فيه شخصية عايزة تأذي وفاء فأنتي كلامك لا هيقدم ولا هيأخر”.

ميار الببلاوي تتهم رجل أعمال بالتورط في قضية وفاء مكي

وكشفت ميار الببلاوي في حديثها، أن تلك الشخصية المجهولة هو رجل أعمال، قائلة: “ده رجل أعمال عادي جدا، بني آدم عادي معاه فلوس في وقت الفلوس كانت بتتكلم، ودول ناس فقراء مش لاقيين ياكلوا بيخرجوا بناتهم وهما عندهم 6 سنين يشتغلوا.. الله أعلم كان بينهم ايه، بس حد متغاظ منها أوي فبيصرف كتير أوي عشان تروح، وفجأة لاقيتها منزلة في الجرايد قولي يا ميار كلمة الحق من 23 سنة”.

استأنفت حديثها باكية: “كانت بتغرق.. وأنتي ممكن تكوني القشاية اللي بتتعلق بيها، فقولت لجوزي لما جه بالليل لو فيها طلاقي هروح أتكلم”.

وأثناء سردها لتلك التفاصيل، استعادت “الببلاوي” ذكرى شهدتها في كواليس تصوير مسلسل “سور مجرى العيون”، حيث أكدت أن وفاء مكي، تشاجرت مع مدير الإنتاج بسبب أنه أحضر وجبتها قبل وجبة المساعدة الخاصة بها، معلقة: “كانت بتبهدله.. وقالت له إنت فاكر ايه كلنا ولاد تسعة، والبنت قبلي”، لتستأنف حديثها قائلة: “أنا قعدت أفكر، هل اللي بتتخانق دي عشان أكل المساعدة، ممكن تبهدلها وتحرقها، طب ربنا خلاني أشوف ليه إن البنات سلام”.

ميار الببلاوي تروي تفاصيل لقائها مع المخدماتية بعد 19 عاما

في نفس اللقاء، كشف “الببلاوي” أن القدر لعب دوره، لتقابل السيدة التي أحضرت الفتاتين لها بعد 19 سنة من الواقعة، إذ أوضحت أن سيارتها تعطلت، مما اضطرها إلى السفر للإسكندرية بالقطار، لتقابلها بالصدفة في محطة مصر، وتروي لها التفاصيل الحقيقية لما حدث للطفلتين من تعذيب، حيث قالت: “والنبي ما ليا ذنب ده اللي جالنا ادى فلوس لأبو البنت وقالهم إنتوا هتقولوا واحد اتنين تلاتة، وزي ما حفظهم”، موضحة الطريقة التي تم من خلالها التعذيب، إذ قالت: “كان بيدي بنته منوم علشان يحرقها.. ده اللي حصل على لسان الست، وقالت أنا اتهددت، وناس كتير في البلد مقدروش يفتحوا بقهم”.

وأشارت إلى أن تلك السيدة توفاها الله عقب إصابتها بفيروس كورونا، معلقة: “حسيت بعد 19 سنة إن ربنا بيقولي يلا قولي.. الناس هتقولي وسكتي ليه، بس والله ما كنت أعرف لها مكان”.

رد وفاء مكي على تصريحات ميار الببلاوي

تلك التصريحات لم تمر مرور الكرام، ففي اليوم التالي استضافت الإعلامية أميرة بدر، الفنانة وفاء مكي، في برنامجها “ملفات” الذي يعرض عبر شاشة “هي”، لتبدأ سلسلة أخرى من التصريحات التي أشعلت مواقع التواصل الاجتماعي.

ردت “مكي” قائلة: “من 23 سنة وأنا في عز مشكلتي ميار الببلاوي بعتتلي جواب وقالت لي دليل براءتك معايا وأنا هقف جنبك وأشهد معاكي، فلما بعتته بقيت أناشدها وأقولها أتوصل إليكي تعالي قولي كلمة الحق بما يمليه عليكي ضميرك.. مفيش ميار”.

تابعت: “واللي فجرت الموضوع ده هند عاكف وسيد شعراوي المصور الصحفي.. هند كان في انتخابات نقابة وكانت مرشحة نفسها فاتصلت بيا وقالت عايزاكوا تقففوا جنبي وتدعموني، فقولت لها كلمي زمايلنا واصحابنا وجت سيرة ميار الببلاوي، فقولت لها لو سمحتي يا هند بلاش ميار أنا مش عايزة أتكلم مع الإنسانة دي تاني، لأن في يوم من الأيام كان في إيديها إنها تنقذني وتتقي ربنا فيا وده محصلش، ففهند قالت لي أبوس إيدك إنتي مش عارفة اللي حصل، فقولت لها ايه اللي حصل؟”.

وفاء مكي تكشف علاقة هند عاكف بدليل براءتها

أشارت إلى أن هند عاكف رد عليها قائلة إن ميار الببلاوي اتصلت بها في يوم من الأيام وهي منهارة من البكاء قبل فترة وجيزة من دخولها غرفة العمليات، لتخبرها بأنها متعبة نفسيا، والسبب هو أن بحوزتها دليل براءة وفاء، إلا أن جواب التهديد الذي وصل لزوجها منعها من الشهادة في القضية.

لتوجه “مكي” رسالة على الهواء مباشرة لميار الببلاوي قائلة: “يا ميار لما انتي ضميرك بيوجعك ومكنتيش قادرة تنامي وخايفة على ابنك، في نقابة روحي وقولي أنا مهددة بكذا”.

رغم تصريحات البراءة التي قيلت من جانب كل من ميار الببلاوي وهند عاكف، إلا أنه تصدر المشهد طرف جديد هو شاهد عيان كان قد شهد في القضية وأكد أن وفاء مكي لم تكن مظلومة، حيث قال إنه اعتاد على زيارتها بين الحين والآخر وفي أحد الأيام، أخبرته وفاء أن الخادمة مروة سرقتها، وأحضرت لها قريب من قسم الشرطة وظل يضربها حتى مثلت الجريمة واعترفت أمامه، لافتا إلى أنه شاهد مروة في منزلها وهي مضروبة ومعذبة.

ميار الببلاوي تهاجم وفاء مكي بعدما كشفت دليل براءتها

بعد ساعات من إذاعة الحلقة، استطاعت ميار الببلاوي، أن ترد على كل الذي انتقدوها بسبب كتم شهادة الحق، ونشرت فيديو الشاهد العيان عبر حسابها الشخصي على موقع “فيسبوك”، وعلقت كاتبة: “اللهم لك الحمد.. ربنا ظهر الحقيقه من شاهد عيان وكده أنا كنت بأنب ضميري على الفاضي سؤال ايه اللي بتعمليه ده يا وفاء انا قلت إن في موقف حصل لكن كده اتحسمت كفاية بقى ملقتيش حد تدوسي عليه غيري وتمثلي البراءة أوعلشان انا مش بتاجر بالموضوع ورافضه أتهم بإني بجري ورا تريند أفضل ألف معاكم على القنوات والمواقع بالشكل المستفز دا”.

تابعت: “أنا قلت شكوكي وموقف حصل الحمد لله انه كان ولا هيقدم ولا يأخر سؤال فين دليل برائتك دا انا قلت للناس أنه حصل كذا فقط واللي حصل دا ملوش أي قيمة خالص بعد شهادة الشاهد دا وبعد ماقريت التحقيقات والتقارير اد ايه انا كنت هبلة في كل مكان تكذبي وانتي عارفة انك مش مظلومة وأنا الحمد لله اتأكدت انك مذنبة والحكم عين الحقيقة”.

أضافت: “كده لما جولى مكنوش جايين من عندها وكده المخدماتية كذابة، شاهد العيان ده ريح قلبي، اخرسي بقى، وبرافو يا ريهام هفضل أقول انك أكبر وأصدق إعلامية في مصر حسبى الله ونعم الوكيل فيكى لا وليكي عين تكذبي وتقولي انك بريئة، وقال كمان مش مسامحني اخس، بس مش مستغربه غير اتنين زميلاتي الإعلاميات ايه ده، ايه كمية الحقد ده، لو كنتوا تعبتوا نفسكم زي ريهام سعيد علشان توصلوا للحقيقة وتريحوا الرأي العام، ومتفكروش في التريند تفكروا في مصداقيتكم كإعلاميات للأسف مكنتوش سمحتوا باللى بتعمله وفاء أعوذ بالله اتعلموا من ريهام سعيد لأنها هتفضل باحثه عن الحقيقة و إعلامية مهنية زي مابيقول الكتاب”.

لم تكتفي ميار الببلاوي، بذلك المنشور وإنما طرحت آخر بعد ساعات قليلة كتبت فيه: “يعنى البنت مشيت من عند وفاء خلصانه وهى اللى رمتها واختها هربت تانى يوم يبقى كلام الشاهد مظبوط ياناس ويبقى البنات جولى قبل مايروحوا عندها وكمان انا لو كنت قلت اللى انا كنت فاهمة غلط ساعتها كنت هتحاكم زى الفنانين اللى اتهموا بالشهادة الزور وفعلا ولا كان كلامى هيقدم ولا يأخر طيب ليه الست وفاء مطلبتنيش للشهادة، وده اللي اتقالي لو محامين وفاء شايفين إن في أي ثغرة كانت طلبتني للشهادة بالنسبة لجزئية إني طلعت عينهم عشان أقول الكلام اللي عندي فأنا قولته مع أكبر إعلامية وفي قناة محترمة وبمنتهى الشفافية هل مطلوب منى ألف على كل القنوات والمواقع علشان أقول حاجة لا هى دليل براءة ولا معايا أي دليل خالص”.

وفاء مكي

ميار الببلاوي تنهي الجدل المثار حول شهادة براءة وفاء مكي

اختتمت ميار الببلاوي الجدل الذي أثارته قبل يومين، مؤكدة أنها ربطت الأحداث وتأكدت بأن واقعة التعذيب حدثت بعدما قابلت الفتاتين وليس قبلها، وكتبت: “ولما شفت التحقيقات وسمعت شاهد العيان ربط الأحداث عرفت اني الحمد لله البنات نزلوا من عندي على وفاء مش العكس يعنى واقعة التعذيب مؤكدة بعد ماكانوا عندي مش قبل وبكده يبقى الست مذنبة والمحكمة والمباحث والطب الشرعي لا غبار عليهم سبحان الله مش حق وفاء اللى رجع حق البنتين اللى شافو قمة العذاب وربنا يفكهم من رقبتي انما الأستاذه وفاء واللى طالعة في كل مكان تشوه صورتي وتبين اني كتمت شهادة كذابة وبينى وبينها القضاء العادل”.