ملخص كلمة الرئيس السيسي خلال قداس عيد الميلاد المجيد
ألقى الرئيس عبد الفتاح السيسي، كلمة خلال قداس عيد الميلاد المجيد بكاتدرائية ميلاد المسيح بالعاصمة الإدارية.
وفيما يلي أبرز ما جاء في كلمة الرئيس عبد الفتاح السيسي:
قال الرئيس: “كل سنة وأنتوا طيبين جميعا، وعيد سعيد عليكم وعلينا جميعا، ويارب السنة دي تبقى سنة خير وسلام وأمن ومحبة علينا كلنا، مش بس في مصر في العالم كله، يارب السنة دي تبقى سنة خير وسلام وأمن ومحبة على الدنيا كلها مش بس في مصر”.
نرشح لك: الرئيس السيسي يتناول الإفطار مع أهالي قرية “أم دومة” بسوهاج
تابع: “أنا عايز أقولكم وأنتوا هيوصلكم صدقي، أنتوا متعرفوش مدى المحبة والتقدير والاعتزاز اللي أنا بقدر بيه قداسة البابا وده مش من فراغ وأنا قولت المرة اللي فاتت كلام كلنا فاكرينه، لكن في كل مرة أسمع حديث لقداسة البابا أو حتى الكتاب اللي صدر عن قداسته، أجد فيه حكمة وبلاغة عظيمة جدا، مش هنسى أبدا القول اللي قاله ده في حديث من الأحاديث الأخيرة دي، لما قال الأديان تتوافق ومش لازم الأديان تتطابق وده صحيح.
أنا بقول الكلام ده علشان تفضل محبتنا لبعض بدون تمييز، ولازم النقطة دي كل الشعب المصري يجتهد أنها تبقى متأصلة في نفوسنا وحتى في الأجيال القادمة، في ولادنا الصغيرة، لكن عايز أقولكم إن إحنا محتاجين دايما نأكد في كل مناسبة، إن إحنا واحد، مفيش أي شكل من أشكال التفرقة بينا، ماينجحش أبدا”.
استكمل: “أنا شايف إن الناس، اسمعوا كلامي، الناس في مصر قلقانة وخايفة، مش هقول إن ده مش مبرر، بس إذا كان كلامي يطمنكم، لازم تطمنوا، إحنا مابنخبيش عليكوا حاجة، ولو سمحتوا يا كل الناس، يا كل المصريين، أنا في كل مناسبة بتكلم وأقول، بقول الحكاية علشان تبقوا عارفينها، فمتديش ودنك لحد أقل ما فيه مش مسئول، يعني إيه الكلام ده، كل واحد يعرف على قده، الموظف، المدير، واللي بعده واللي بعده، لغاية ما نوصل للي ربنا أراد أن هو يبقى متولي المسئولية.
عايز أقولكم من فضلكم، أولا ماتخافوش، طيب ليه ماتخافوش؟ الكلام مش ليكوا أنتوا بس، ما الناس كلها دلوقتي بتتفرج عليا، في البيوت يعني، أنا بكلم كل المصريين، ماتخافوش لسببين، الأول إن ربنا موجود، هيسيبنا يعني؟ يعني ربنا هيسيبنا؟ أنا بقول على ربنا اللي خلقنا كلنا”.
أردف: “الكلام اللي أنا بقوله ده كلام مهم أوي لأن أنا شايف وسامع كويس أوي إن الناس في مصر قلقانة، طيب أنت قلقان ليه؟ يقولك أنا خايف عليها، وأنا سعيد بخوفك عليها، فأنا بقولكوا لاء ماتخافوش لسببين، السبب الاولاني إن ربنا موجود وهو أعز من الكل وأكبر من الكل ويقدر يعمل كل حاجة طيبة لينا، طيب إحنا نستحق كده؟ بنحاول نبقى نستحق.
إحنا كدولة بمسئوليها حريصين على إن إحنا الأزمة الكبيرة اللي موجودة في العالم دي تأثيراتها ضخمة جدا، الدنيا هتبقى بعد الأزمة الأخيرة دي، هتبقى مختلفة عن الدنيا اللي إحنا شوفناها قبل كده، والأزمة الاقتصادية دي هتأثر في دول كتير لو استمرت الحرب دي السنة دي أو أكتر، طيب إحنا فين؟ إحنا الحمد لله رب العالمين ماشيين كويس وإن كنا بنعاني، يعني بنعاني آه، لكن مانخافش، مانقلقش.
وبقول من فضلكم هتلاقوا ناس بتتكلم كلام كتير، أقل حاجة اللي بيتكلم ده مايعرفش، فيقولك خلي بالكوا قناة السويس مش عارف هيعملوا فيها إيه، خلي بالك هيبيعوا حاجة مانقولش عليها، طيب ليه؟ مش هقول ليه؟ لو في حاجة هعملها، هقولكوا كلكوا، وزي ما أنا بتكلم كده هتكلم وأقول.
عام سعيد، كل سنة وأنتوا طيبين، ربنا يحفظكم ويا قداسة البابا دعواتكم الطيبة لينا ولمصر”.