حسن الرداد يتحدث عن علاقته بالكلاب والقطط
تحدث الفنان حسن الرداد عن علاقته بالحيوانات وخاصة القطط والكلاب، ذاكرا مجموعة مواقف طريفة منذ الطفولة.
قال “الرداد” عبر برنامج “صاحبة السعادة” المذاع على شاشة dmc وتقدمه الفنانة إسعاد يونس: “أنا بتعاطف جدا مع الحيوانات وأنقذت قبل كده مرتين قطة مع إن أنا مليش في القطط خالص لأن أنا مبحبش الحيوان اللي حركته سريعة، والسي في بتاعي في حياتي مع القطط والكلاب زي الزفت، يعني أنا طول حياتي وأنا صغير بتجري ورايا الكلاب في الشارع ماما تقولي انزل هات حاجة من السوق، انزل طفل بريء الاقي كلاب بتجري ورايا فأجري، فطلعت غصب عني الكلب مش حيوان صديق الإنسان ده عدو الإنسان، القطط بقى تيجي مواقف بالصدفة إني أبقى قاعد في مكان والاقي القطة بتجري من تحت الكرسي فاتخض أو داخل البيت وبير السلم ضلمة والاقي قطة”.
تابع: “طبعا فيه ناس بتحب حاجات وناس لاء لكن ده مش معناه إني ضد الكائنات، مرة أنقذت قطة من المطر وكان شديد جدا وتكاد تكون كانت بتغرق وشيلتها وحطيتها في الشمس ودي حاجة عكس شخصيتي، فأنا ضعيف جدا ناحية الحيوانات”.
استكمل: “لما اتجوزت إيمي كنت في الأول بستغرب الحب الفظيع بتاع الكلاب، فشوفت قد إيه الكلاب بالنسبة للناس اللي بيعشقوا الكلاب كأنه واحد من عيالهم، كأنه حد من أفراد أسرتهم، يعني إيمي ماشية في شنطة العربية على طول بأكل الكلاب والقطط وماشية تأكلهم في الشارع وتعمل خناقات علشان لو حد بيؤذي كلب أو قطة.. مرة كنت قاعد في البيت وإيمي معدية كده في لحظة رومانسية، وقالت لي: “حسن، أنا بقيت بحبك قد الكلاب.. فقولتلها ده يعتبر مدح ولا ذم يعني دي حاجة حلوة ولا وحشة ولا أنا وصلت لمرتبة كبيرة؟، قالت لي: “لاء ده أنا كنت بقول لبابي أنا بحبك أنت والكلاب أكتر حاجة”.
