تامر حسني للمحبطين: الراحة المطلقة في الجنة بس!
وجه الفنان تامر حسني مجموعة من النصائح للمحبطين والذين يشعرون باليأس لعدم تحقق أحلامهم، موضحا معاناته في البداية وصعوبة وصوله لما هو عليه الآن.
كتب “حسني” عبر حسابه على موقع تبادل الصور والفيديوهات “إنستجرام”: “قرأت معظم التعليقات على قد ما قدرت على آخر بوست ليا اللي فوق دا، وفهمت أكتر حاجتين من تعليقاتهم عاملين إحباط لمعظمكم. 1- اليأس من النجاح 2- إحباط المقربين، وبعضكم واصل لفقدان الأمل والشغف وبعضكم فاقد الأمل في الحياه نفسها”.
تابع: “هطلب طلب منكم قبل أي شيء افتكروا معاناتي في بدايتي وظروفي الصعبة من غير أب ومن غير أي فلوس وبنزل أشتغل في الشوارع من عامل بنزينة لسوبر ماركت لفاعل يعني اللي بيبنوا العمارات بطلع طوب وأسمنت عشان أرجع بيتي لأمي الغلبانة بأي خمسة جنية، بالإضافة لمرتب النادي لما كنت بلعب كورة كان مرتبي 22 جنيه في الشهر منهم بقى تحويشة الميه والكهربا وعمليات أخويا عشان كان عيان لفتره كبيره كنت بعمل المستحيل فعلا عشان أمي وأخويا وعشان أوصل لهدفي”.
أضاف: “كان جوايا سعي دائم لطريقين الكورة والغناء وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره زي ما أنا كان نفسي أبقى لاعب كورة و الكورة مش ليا والأندية كلها مشوني رغم تفوقي، كنت بسأل نفسي ليه الابواب كلها بتتقفل في وشي اتاريها بتتقفل عشان توجهني لمسار آخر و لما آمنت بكده فهمت قدام أن ربنا كان شايلي الأحسن ليا بس ساعتها مكنتش فاهم، واللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايما أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني فاوعى تقول تعبت عالفاضي”.
اختتم: “وبالنسبة للمحبطين هيفضلوا موجودين أنت اللي بتسمعلهم وأنت اللي بتسمح أنك تتأثر بيهم امنع دا فورا، متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك أنت السبب دايما قول يا رب واجتهد وأفهم أن الراحه المطلقة في الجنه بس، وإحنا على الأرض وربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب ووصلوا يبقى الموضوع فينا، متبقاش أكبر عدو لنفسك، أنت السبب، خد قرار صارم فورا في التغير والنهوض والنجاح، والله هتوصل متسمعش غير لقلبك وسلم قلبك للّي خلقه وتوكل على الله”.
View this post on Instagram
في سياق آخر، يعرض فيلم” بحبك” لتامر حسني في السينمات حاليا، ضمن موسم أفلام عيد الأضحى 2022.
يضم الفيلم عدد من أبرز النجوم، منهم: هنا الزاهد، هدى المفتي، مدحت إسماعيل، حمدي الميرغني، شهد الشاطر، والفيلم من إنتاج حسام حسني، وتأليف وإخراج تامر حسني، في أولى تجاربه الإخراجية.
كان قد طرح الفنان تامر حسني، ألبومه الجديد “عشأنجي”، عبر قناة شركة “روتانا” الرسمية على “يوتيوب”، يضم الألبوم 9 أغنيات مختلفة، جاءت أغلبها على شكل فيديو كليب.
