مروة سامي تكتب: الإعلام واللي منه

المكان: صوان منصوب أمام مدينة الإنتاج الإعلامي لأحياء حفل افتتاح موقع  (E3lam.org)

الزمان: بعد صلاة المغرب

الحدث: التجهيز لحفل تدشين الموقع

الشخصيات : كاتبة هذه السطور ، الحاج رويعي أسطى – اقصد – باش مهندس الإضاءة

…….

الإعلام ، و كمان مرة الإعلام ، يعني الناس الي مكملين علامهم  اللي ماسكين الحديدة( الميكروفون) ، و اللي بينوروا مخنا ، يعرفونا ايه اللي بيحصل حوالينا ، و يجيبولنا الأخبار لحد عندنا ، و احنا منتأخين في مكاننا و بنسأسا البقسماط في الشاي بلبن .

و النهاردة فرحي يا جدعان ،  نجري بعض التجارب  2،4،6،8،10

يلا كله يخش الموقع برجله اليمين ، و يسمي ، زودلي  الكهارب عا اليمة دي ياسطى و النبي

الموقع دا إعلام أصلي إعلام على أبوه .

ألا مؤاخذه ، هو يعني ايه إعلام يا أستاذه  -سؤال غير متوقع من أسطى الكهارب الباشمهندس رويعي-  هتعملو إعلانات محلات  يعني و يفط قماش كدة؟

أنا طبعا أشفقت عا الراجل و حبيت أفهمه بطريقة مبسطة  شوف يا بش مهندس رويعي في فرق كبير جدا بين الإعلام و الإعلان

الإعلام: نقل الأخبار والمعلومات الجديدة والتى تهم الجمهور في وقت معين وتتميز المعلومات بالدقة – الصدق – الحالية والأهمية.

لكن الإعلان يا ريس رويعي يختلف تماما ألا و هو جهود مقصودة للتأثير في الغير لإقناعه بفكرة أو سلعة أو رأى بهدف تغيير سلوكه وتعمد إحداث تأثير، وقد تتضمن معلومات لا تتسم بالصدق أو الدقة أو الأمانة في بعض أنواعها.

 

الراجل بقى اتفتح كأنه قاعد على كرسي  دكتور الاسنان ، وواخد بنج موضعي،  فحبيت أبسط له المسالة.

 

يعني مثلا عندك الرواد الإعلاميين ا/ لميس الحديدي ، و ا/ توفيق عاشة ، و ا/أحمد موسى عارفهم؟

 

فرد عليا الأسطى رويعي يعني انتوا يا أستاذة هتعملوا زيهم ؟  أصل  يعني الست لميس و الأخ عكاشة و الناس دي لا مؤاخذة بيقولوا كلام يخلي  نافوخ الواحد يضرب، كذا مرة كنت هرمي اليمين عا المودام و اهج من البيت و اقلب كوباية الشاي في وش البت شيماء بنتي دول كرهونا في التلفزيون و الراديو و الجرايد يا أستاذة. دا أنا كنت كييف أقعد أسمع الراديو و اتفرج على برامج التلفزيون و النشرة يا أستاذة و الله و كنت بخللي البت (شمياء) تقرالي الجرايد كل يوم الصبح.

 

عشان كدة بقى ياحاج أبو شيماء ، احنا عملنا الموقع بتاعنا عشان نرجعلك الثقة في الإعلام ،  لما تدخل على الموقع بتاعنا هتلاقي الصحافة  على أصولها ، و تتابع كل الأخبار قبل أول ما تحصل ،و هتلاقي نفسك مش بتستغنى عن الموقع و هتدعيلي .

طب و النبي يا أبلة : تكتبيلي الوصفة عشان أزروكو في الموقع الجمعة الجاية بعد الصلاة.

أنا: حاضر يا حاج هكتبلك العنوان ، بس ياريت تجيب الحاجة و الآنسة شيماء معاك ، عوض عليا عوض الصابرين يارب.