دعاء فاروق: "عاوزة أمشي بميكروفون وأقول عملت عمرة"
أدت الإعلامية دعاء فاروق، مناسك العمرة، وعادت لتروي لمتابعيها، وتعدهم بمزيد من الصور، والفيديوهات التي وثقت بها رحلتها لأطهر بقاع العالم.
نشرت دعاء فاروق عبر حسابها على موقع تبادل الصور “إنستجرام” مجموعة من الصور لها من أمام الكعبة المشرفة، والمسجد النبوي، وعلقت عليها قائلة: “رجعت من أحلى رحلة في الدنيا رحلة نقاهة من الهموم والضغط. رحلة علاج من أي زعل من أي وجع.. قلبي انشرح فعليا اتغسل، ونضف والله العظيم. ده الاحساس حرفيا زي ما يكون كان معبي وشايل كتير ورحت فضيت هناك ونضفته..والله العظيم ما هو كلام وخلاص والله العظيم أنا صادقة في كل كلمة انا استمتعت في الرحلة دى بكل المتع اللي شفتها وعشتها في الدنيا .. أي سفرية في الدنيا صفر على الشمال جنب السفرية دى بالتحديد”.
نرشح لك: دعاء فاروق تسخر من تصريحات لقاء الخميسي عن علماء الدين
وأضافت: “قررت أوثق أحلى رحلة في حياتي بالصور والفيديوهات وهنزلها تباعا.. العالم كله هناك بيصور كل لحظة.. كل الجنسيات كل الأعمار رجالة وشباب وحتى الستات الكبار جدا في السن فاتحين الموبايلات وبيصوروا لأهاليهم الجمال اللي احنا فيه … الناس بتطوف وفاتحين لايف، وأهاليهم علي الناحية التانية بيبكوا بكاء حارا… جنسيات كتير محدش فاهم لغة التاني إنما بيدعوا بنفس الدعاء وبيعملوا نفس المناسك وفي قلوبهم نفس الحب والاشتياق للعبادة في بيت ربنا قبلة المسلمين في العالم أجمع … أنا بقيت كل يوم افتح الكاميرا وأكلم ولادى وجوزي، وأخواتي وأصحابي واقولهم متعوا عنيكم بأحلي خلفية في الدنيا أنا ورايا الكعبة يا بشر الكعبة على بعد خطوات مني … أنا في مسجد النبي يا ناس النبي عليه افضل الصلاة والسلام موجود هنا في المكان اللي انا واقفة فيه ده …
وتابعت: “بنتي فتحت المكالمة الفيديو كول لقيتني واقفة وورايا الكعبة قالت لي بمنتهي البساطة و الانبهار واااااااو المنظر حلو قوي قلت لها ده بيت ربنا يا روكي متعي عينك مجرد النظر للكعبة عبادة … بقي نقف نتصور جنب نافورة ولا زرعة ولا برج حديد ولا سور اسمنت واحنا فرحانين ونيجي عند أطهر بقاع الأرض في بيت ربنا في الحرمين الشريفين والناس تشكك في النية وتقولك أعبد ربنا وأنت ساكت ومتتصورش ومتبينش ومتقولش ومتعملش”.
واختتمت: “ده أنا عاوزة أمشي بميكروفون وأقول أنا عملت عمرة يا ناس ده شرف ما بعده شرف وتكريم ما بعده تكريم … اخيرا لبيت الدعوة يا رب شكرا يا رب كان بقالي اتناشر سنة مدخلتش هنا واخيرا ربنا كتبها لي … أنا فاكرة زمان لما حجيت ورجعت بقيت أدور علي الأذان في التلفزيون عشان أشوف الكعبة اللي انا لسه كنت واقفة عندها .. دلوقتي الوضع اتغير مش لازم نستني نشوف الأذان عشان نشوف شكل الكعبة. كل واحد راح الكعبة جت له الفرصة أنه يلقط لنفسه صورة مع اطهر بقعة في الأرض . البقعة التي تستقر فيها الكعبة شامخة في منتصف الكرة الأرضية بالتمام و الكمال.. محور الكون التي يلتف حولها باقي الكون وتتحرك البشريه من حولها كعقارب الساعة وتتسع الدائرة وكلما اتسعت كلما بعدنا “.
View this post on Instagram