منى الشاذلي عن برنامجها: كل حلقة يترتب عليها سمعتي المهنية
قالت الإعلامية منى الشاذلي، إن البرامج الكبرى والناجحة في رأيها لها العديد من المعايير التي يجب الالتزام بها، كالمصداقية واحترام عقلية المشاهد.
تابعت “الشاذلي” خلال لقائها مع البرنامج الإذاعي “الراديو بيضحك” مع الإعلامية فاطمة مصطفى، المذاع على راديو “9090”: “مفيش برنامج ناجح يقول أنا هعمل ضربة في أول الموسم وآخر الموسم وشكرا على كده، الفكرة في الثبات.. أنا قبل ما بتعاقد مع القناة اللي أنا فيها بتعاقد مع الجمهور، وبحط حد أدنى للجودة وهو حد مرتفع جدا، مينفعش نخذل المشاهد في أي حاجة.. كل حلقة هي أهم حلقة لأنها هيترتب عليها سمعتي المهنية”.
نرشح لك: منى الشاذلي: رفضت ظهور ميجا ستارز في برنامجي بسبب ضميري
أضافت: “مش مستعدة أبيع نجاح خاطف على حساب المؤسسة اللي أنا فيها، لازم تكون على درجة من المؤسسية والمخاطبة.. مفيش ثانية تتعرض إلا وفي إباحة لحقوق ملكيتها، ده بيخلي طول الوقت عندك رصيد حتى خارج حدود بلدك.. البرنامج الكبير مش صدفة ولا ميرانية ولا ديكور ولا نجم”.
في سياق متصل، قالت الإعلامية منى الشاذلي، إنها رفضت ظهور نجوم كبار في أوقات معينة من حياتهم، لعدم رغبتها في استغلال أزماتهم ومخالفة ضميرها المهني.
تابعت: “في قرارات مهنية صعبة الإنسان القوي هو اللي بيقدر ياخدها، وأحيانا بيبقى النجاح قدام وجايلك على حجرك وتقول لأ مش عاوزه، أوقات بيبقى في شخصية كبيرة وميجا ستار بمثابة صيد ثمين هيجيب فرجة وناس في الوقت ده تحديدا، وهو اللي يطلب يطلع معايا بس أنا أحس إن الشخص ده مش متزن نفسيا في الفترة دي.. فبرفض”.
أضافت: “لأن لو عملنا الحوار في الفترة دي.. هيتأذي طول العمر، أنا قلت لا لميجا ستارز لا يقاوموا، لأنها تبقى جريمة لو وافقت.. وياما نجوم زعلوا مني بس بعد سنين قالوا لي ليكي جِميلة في رقبتنا إن مخلتيناش نطلع وإحنا في الوضع ده”.