نشوى مصطفى: الموت الكتير خلاني أشوف الدنيا ولا حاجة
صرحت الفنانة نشوى مصطفى، أن كثرة عدد حالات الوفيات من حولها، قلل من أهمية الحياة في عينها.
كتبت “نشوى” عبر حسابها على “فيسبوك”: “عندي حالة من السلام والزهد العظيم واستبساط كل الأمور، واستصغار الدنيا.. الموت الكتير المحيط بينا خلاني أشوف الدنيا بحجم الولا حاجة، كل حاجة بنجري علشان نلحقها أو بنتصارع علشان نحصل عليها، بتتحول لصفر لما بنمشى ونسيبها وكل الأمور بتموت بموت صاحبها”.
نرشح لك: تفاصيل برنامج “مهرجان الهلي” لـ خالد عليش
أضافت: “يقيناً قلبي اتأكد وعقلي سلم تمام التسليم إن الحكمة من وجودنا إننا نتعلم بالتجارب والبرهان طول رحلتنا إنه لا شريك له، هو مالك كل شئ وإليه المصير”.
يشار إلى أن آخر أعمال الفنانة نشوى مصطفى، مشاركتها في المسلسل الإماراتي “اللي نحبهم”، من إخراج باسم شعبو، وتأليف مرعي الحليان.
وكانت الفنانة نشوى مصطفى، أعربت عن استيائها من تصدر مواهب “التريند”، منصات التواصل الاجتماعي بدلا من الموهوبين الحقيقيين.
كتبت “مصطفى” عبر حسابها على موقع التواصل الاجتماعي “فيس بوك”: “ربنا حيحاسبنا على شباب موهوبين حقيقيين لما كانوا بيسألونا نبتدي منين كنا بننصحهم إن دراسة الفن شيء مهم -عفواً يا شباب ضيعنا عليكم فرصتكم فى النجومية والتألق والتحقق- سامحونا معلش الأساتذة اللي اتربينا فنيا على إيديهم هما اللي خدعونا وفهمونا غلط، فهمونا إن الموهبة الحقيقية لازم ندعمها بالدراسة والثقافة”.
تابعت: “فهمونا إننا لازم نقرى كتير في كل حاجة وندرس أدب وفن تشكيلي وموسيقى، فهمونا إن الفنان سفير بلده وفهمونا إن الفنون نور، فهمونا إن الفنون جمال بينعش الروح والوجدان -بصحح غلطتي وبحذركم- اوعوا تضيعوا وقتكم ماتاخدوش نصايح مننا، ركزوا على الترند وانسوا خالص كلامنا العبيط”.