أبرز تصريحات الرئيس عبد الفتاح السيسي اليوم
تصريحات الرئيس عبد الفتاح السيسي
تحدث الرئيس عبد الفتاح السيسي معلقا على المتحدثين في ندوة “تحديات وظائف المستقبل”، ضمن فعاليات المنتدى العالمي للتعليم العالي والبحث العلمي والمؤتمر العام لمنظمة الإيسيسكو بالعاصمة الإدارية.
فيما يلي أبرز تصريحات الرئيس عبد الفتاح السيسي:
1- يا ترى في الـ 50 دولة في منظمة المؤتمر الإسلامي ولا أكتر من 50 دولة ما هو حجم التعليم الجيد المتاح؟ إذا كنا بنتكلم على إن المعرفة الحقيقية وجودتها هو كنز، هو ثروة حقيقية ولكن للحصول عليها لا بد من جود قدرات، أولها قدرات اقتصادية للدول علشان تقدر توفر التعليم ده.
2- إحنا كان عندنا هنا في مصر إتاحة، إتاحة يعني إيه؟ يعني كان عندنا تعليم للجميع، لكن يا ترى التعليم للجميع كان جودته بنفس المستوى اللي بيقدم في الدول المتقدمة، في أمريكا وبريطانيا وفي دول أخرى كثيرة؟ افتكر بمنتهى التواضع لأ، بمنتهى الوضوح لأ، مكنش كده، وبالتالي مكان الخريج المتعلم عندنا، أنا بتكلم عن دول منظمة المؤتمر الإسلامي، وممكن ده إذا كنتوا تقبلوا إنه يتقال على مصر، أنا قابله، لأننا تصدينا لهذه القضية بجلاء.
3- وقولنا إن إحنا إذا كان مطلوب بالمعايير العددية إن لكل مليون يبقى فيه جامعة، يبقى إحنا محتاجين نعمل 100 جامعة، واتحركنا في خلال الـ 6 سنين اللي فاتوا علشان نعمل جامعات لكن أيضا علشان نعمل فيها حجم للجودة من خلال التوأمة مع جامعات عالمية علشان هما يعلمونا وده موضوع إحنا نقبله بكل ود ، إن نتعلم من غيرنا ونتعلم كويس علشان إحنا ناخد مسارنا ونحقق بشبابنا وشاباتنا، أنا بقول النهاردة في منظمة المؤتمر الإسلامي وأيضا في مصر.
نرشح لك: شاهد.. بكاء الرئيس السيسي خلال احتفالية “قادرون باختلاف”
4- اللي أنا عايز أقوله كتنفيذي، كمسؤول عن دولة، علشان نقدم تعليم جيد، أنتوا بتتكلموا عن 35 لـ 40٪ من شباب منظمة المؤتمر الإسلامي، إن مكنش أكتر في التعليم لو قولنا في أكتر من مليار وشوية بيتعلموا يبقى في حوالي 400 مليون إحنا بنقدملهم تعليم عامل ازاي؟ طيب هو ثقافة المعرفة والتعليم في بلادنا بتقبل بده؟ دايما عندنا يقولك الناس خدت الماجستير والدكتوراه، صحيح، بس في معارف ليست لها أشغال، في علوم ملهاش أشغال بالحجم اللي بيتخرجوا بيه الناس.
5- علشان نحصل على تعليم جيد ونتائجه بنتكلم على 15 أو 20 سنة علشان تبدأ المجتمعات تشعر بجودة ونتائج الجودة دي، طيب إحنا هل مجتمعاتنا تقدر تتحمل ده؟ مع الوضع في الاعتبار اللي هقولكم عليه، إحنا في العالم الإسلامي، دخلونا في متاهات كتير جدا بفكر متطرف جاهل يؤدي إلى إن إحنا نصطدم مع الواقع وحياتنا وبالتالي مبقيناش قادرين نركز، أنا بتكلم على الدول والحكومات، تركز إن هي تحقق لمجتمعاتها مش بس معرفة، استقرار لإنجاح الخطط المختلفة.
6- أنا بتكلم هنا على الـ 54 أو 55 دولة دول، يا ترى حجم الاستقرار الموجود عندهم قد إيه؟ يا ترى حجم القدرة الاقتصادية الموجودة عندهم حتى تستطيع إنها تعطي معرفة حقيقية، تعطي جودة حقيقية علشان النهاردة يكون عندي في التعليم في مصر 24 أو 25 مليون، علشان اديهم تعليم حقيقي بجودة حقيقية، عايز أرقام مش موجودة، مش متاحة، وبالتالي السبق هيبقى إحنا دايما فيه متأخرين وبعدين التصارع في التقدم بقى عالي جدا.
7- إحنا هنا في مصر جادين بإرادة لا تلين من أجل مجابهة تحدياتنا اللي منها التعليم، إن إحنا بنعتبره أساس البناء للدول، التعليم الحقيقي والجودة الحقيقية، وبقول لينا دلوقتي وأرجو إن الكل يسمعني، الجامعات العظيمة الموجودة في العالم، أنتوا بتتكلموا عن حقوق الإنسان وأنا بتكلم معاكوا عن حقوق الإنسان، عايزين تساعدونا؟ ساعدونا في إن إحنا يبقى لدينا معرفة وتعليم حقيقي زي اللي موجود بمعايركم وبمستوياتكم، علشان ده حق من حقوق الإنسان.
8- علينا إن إحنا نعمل في بلدنا هنا وهنفضل نعمل في بلدنا هنا وهنفضل نقاتل من أجل المعرفة والتعليم الحقيقي في بلدنا هنا، وبقول للعالم الإسلامي انتبه تماما للفكر المتطرف الأحمق اللي الهدف منه إنه يدمرك ويدمر مستقبلك زي ما هو بيدمر حاضرك، الإسلام مالوش علاقة بالفكر الجامد والمتطرف اللي بيهدف إلى تدمير الشعوب وتدمير مستقبلها وحضارتها.
