أحمد فهمي: عندي فوبيا من المرض
قال الفنان أحمد فهمي، إن الفنان محمد رمضان ممثل متميز، والخلاف بينهما كان على السوشيال ميديا بسبب قضية الطيار وتم حل الخلاف وعادا لصداقتهما.
أضاف “فهمي” خلال حلوله ضيفا على برنامج “حبر سري”، مساء الجمعة، المذاع عبر شاشة “القاهرة والناس” مع أسما إبراهيم: “محمد رمضان ممثل شاطر وربنا يزيده وأداءه التمثيلي كويس جدا، لكن مفيش حد فارق عن حد وهو ممثل كبير جدا وشاطر جدا، ومش بحب انتقد تمثيل الزملاء”.
نرشح لك: نجل عبد الرحمن الشرقاوي ينفي سعي والده للحصول على “نوبل”
أضح موقفه من ترتيب الأسماء حال مشاركته مع الفنان محمد رمضان في عمل فني، قائلا: “لو أنا ورمضان هنشتغل مع بعض اللي بيحقق إيرادات أكتر اسمه يتكتب الأول، ومش بقول أنا أعلى منه ولا هو أعلى مني”.
كما جدد الفنان أحمد فهمي، اعتذاره عن مسلسل “رجالة البيت، قائلا: “مسلسل رجالة البيت حقق مشاهدة وإعلانات، ولكن ظروف المسلسل كانت صعبة جدا، وكنت بصور فيلم (العارف) وأكرم بيعمل مسرحية في السعودية والوقت كان ضيق قوي للمسلسل وده غلط مني أنا وأكرم والمسلسل اتكروت ودخلنا المسلسل فى عز الكورونا”.
في سياق آخر، قال إن استمرار معاناته مع المرض يسبب له ضيق ولكنه غير نظرته للحياة واستشعر نعمة الصحة، مردفا: “عندي فوبيا من المرض، ومش بخاف من الموت ولكن المرض بيضعف وأنا مش بحب الضعف، ومفيش حاجة مستاهلة الخناقة والمرض بتاعي أساسه الضغط.. وعندي 40 سنة ومعتقدش هعيش قدهم تاني”.
كما ذكر أنه كان على خلاف مع الفنان أحمد حلمي خلال تصوير فيلم “كده رضا”، مضيفا: “كنت على خلاف مع أحمد حلمي زمان إنما دلوقتي مفيش أبدا، والخلاف كان فى الشغل في (كده رضا) وهو كان نجم العمل وهو اللي استلمني وأنا كنت متحمس”.
تابع: “أنا تعلمت من أحمد حلمي حاجات كتير ترجمتها بعدها بسنين، وأنا أعمل مع أحمد حلمي أي دور وجيل أحمد السقا وأحمد حلمي وكريم عبد العزيز وأحب أنزل وأنافسهم، ولكن ببص لهم بصة فوق وأنا من جمهورهم وبتفرج على أفلامهم، وارفض اسمي يبقى جنب اسم أحمد حلمي وأنا بعديه”.