محمود الليثي عن مجموعه في الثانوية: اعتبرت الـ92% قمة الفشل
شارك الفنان محمود الليثي، قصته مع الثانوية العامة قبل 19 عاما، وكيف تغيرت حياته بسبب كلية الهندسة ومجموعه.
كتب “الليثي” عبر حسابه على موقع التواصل الاجتماعي “فيس بوك“: “في نفس الوقت دا من يجي 19 سنة، كنت قاعد في أوضتي بعيط عشان جبت 92% ودا كان بالنسبالي قمه الفشل، كنت بعتب على نفسي وبحمل فشلي (من وجهه نظري) على شماعات كتير.. وكنت شايف الدنيا سودا لإني مش هحقق حلمي إني أكون دكتور”.
تابع: “واضطريت أسفًا إني أحول علمي رياضة عشان مكنش قدامي غير هندسة اللي تناسب مجموعي وكنت مش حاببها ولا طايقها، وفي هندسة بعدت عن أهلي ورحت محافظة تانية واتعلمت حاجات كتير مكنتش هتعلمها في طب وعرفت ناس تانية وثقافات تانية وشخصيتي بدأت تتكون واحدة واحدة”.
نرشح لك: تفاصيل تنسيق الجامعات لعام 2021
أردف: “والأهم من كل دا في هندسة عرفت يعني إيه مسرح وحبيته وحبيت التمثيل وبدأ حلمي يتغير من دكتور لمهندس لممثل”.
استكمل: “خلاصة الكلام.. مش لازم تجيب مجموع كبير عشان تكون إنسان ناجح في حياتك ومش لازم تطلع من الأوائل ممكن تكون مش شاطر في الدراسة بس شاطر في حاجة تانية.. أهم حاجة أنك تعرف أنت شاطر في إيه وتنميه لأنه ممكن يكون هو دا سبب سعادتك بعد كدا”.
اختتم: “ملحوظة.. محدش يتريق إني شايف 92% مش مجموع كبير لأن دي كانت قناعاتي وقتها”.
يذكر أن محمود الليثي، شارك في رمضان 2021، بمسلسل بين السما والأرض مأخوذ عن قصة الأديب الكبير نجيب محفوظ، بطولة هاني سلامة ودرة، يسرا اللوزي، سوسن بدر، نجلاء بدر، نورهان، ندى موسى، أحمد بدير، منى عبد الغني، محمود الليثي، سيناريو وحوار إسلام حافظ، ومن إخراج محمد العدل.
وتدور أحداث المسلسل حول تعطل مصعد كهربائي في إحدى عمارات أحياء القاهرة بركابه بين السماء والأرض، حيث يتعرض الركاب المتواجدون داخل المصعد لمشكلات عدة، وكل شخص منهم لديه مواقف وذكريات مختلفة عن الآخر، كما إنهم مختلفين من الطبقات العليا والمتوسطة والفقيرة.
وقدم المسلسل من قبل في فيلم سينمائي عام 1959، وشارك فيه عدد كبير من الفنانين، أمثال عبدالسلام النابلسي، وهند رستم، وعبد المنعم إبراهيم، ومحمود المليجي، وسعيد أبو بكر، ونعيمة وصفي، وعدد كبير من ضيوف الشرف الذين ظهروا لمشهد واحد.