بعد بتر قدمه.. تفاصيل إصابة شريف دسوقي
أعلنت الفنانة بدرية طلبة، قبل قليل، عن بتر قدم الفنان شريف دسوقي دون أن توضح تفاصيل الإصابة.
لكن قبل عدة أسابيع، كان شريف دسوقي قد طرح عبر صفحته على موقع “فيس بوك” منشور أوضح من خلاله تفاصيل حالته الصحية بالكامل، وكتب الآتي: “اللي حصل إني أُصبت في رجلي أثناء تصوير أحد المسلسلات اللي مشوني منها، ويشهد على كدا كل اللي بيتعاملوا معايا.. اتصابت يومها بجرح صغير ومكنتش أعرف إني عندي سكر المهم روجت وجيت تاني يوم حسيت بدوخة قولتلهم ودوني المستشفى أفاجئ إن ولا واحد من المسلسل معايا باستثناء المنتج أحمد الجنايني وهو منتج فيلمي وقفة رجالة”.
نرشح لك: بتر قدم شريف دسوقي.. وبدرية طلبة تطلب الدعاء
تابع: “عملت تحاليل واكتشفت إني عندي سكر وخبيت على الأستاذ أحمد الجنايني إني مصاب عشان معطلش التصوير بتاع فيلم وقفة رجالة الحمد لله نتاج تحملي ربنا كرمنا، خلصت الفيلم وداخل حجات تانية فوجئت إن الدنيا كلها بتقول مشّوا شريف من المسلسلات عشان بيخش مخمور وسكران.. أنا المتربي على مدرسة إسماعيل ياسين أنا مدرّب مادة التمثيل مستحيل أبقى نصاب، بطالب بحقي فقط لا غير إني أتعوض عن اللي حصل.. أنا مخدتش تلت أجري ومش عيب أٌقول كدا”.
أضاف: “مصحة نفسية؟.. هي زيارة نفسية اللي روحتها وكانت من 20 سنة لما انفصلت عن زوجتي أم ابني، هو فيه حد لما ينفصل عن زوجته ينزل الشارع يرقص؟.. أنا 40 سنة ببني نفسي بدراعي واشتغلت مع أكبر مخرجين مصر اسألهم شريف عامل أيه في اللوكيشن”.
اختتم: “ليه الموهوب واللي بينوّر في زماننا بيحاربوه؟، ليه احنا البلد اللي بتقتل الموهوبين الحقيقيين؟، أنا زعلت عشان حالتي كانت صعبة من 8 شهور استشاريين كانوا يعيطوا وميقدروش يبصوا لرجلي النهاردة الحمد لله ربنا عافاني بعد فترة مقولتش لحد فيها حاجة بس من حقي أزعل لما أتكشف إعلاميًا غصب عني أنا مكنش عندي صداع أنا كنت مهدد فعلًا ببتر رجلي!، عيب يتقال عليا إني روحت مصحة نفسية أو بدخل اللوكيشن سكران أنا بحضر قبل التصوير بساعتين وبقعد مع العمال نظبط الديكورات ونفطر مع بعض .. الظلم وحش”.
يشار إلى أن بدرية طلبة كانت قد كتبت عبر صفحتها الرسمية على موقع “فيس بوك”: “عن تجربة عيشتها مع بابا الله يرحمه صعب قوي بني آدم يفوق من البنج يلاقي جزء من جسمه مبتور وخصوصا رجليه ربنا يصبرك ياشريف ويقوي قلبك ويتم شفاء علي خير”.
وكانت قد طرحت قبل ذلك منشور كتبت فيه: “شريف دسوقي داخل العمليات كمان ساعة دعواتكم من فضلكم”.