مفيدة شيحة: ليه فيه ستات متضايقة إني بعتز بنفسي؟

علقت الإعلامية مفيدة شيحة على الانتقادات الموجهة لها بسبب أسلوب تقديمها خلال برنامج “الستات ميعرفوش يكدبوا” المذاع على شاشة cbc.

نشرت “شيحة” عبر صفحتها الرسمية على موقع التواصل الاجتماعي فيسبوك، وكتبت: “الحقيقة أنا معرفش ليه فيه ستات كتيرة متضايقين من فكرة إني ست بتعتز بنفسها قوي وبنجاحها وإن في فرق كبير من كوني ست قوية وبحب الجد ومقبلش بأي تجاوز في حقي، وبين الغرور”.

نرشح لك: مفيدة شيحة لمشاهير السوشيال ميديا: بلح أنتم ولا حاجة خالص

تابعت: “أعتقد إن كتير من الستات دي شايفين إن دور المذيعة لازم يبقى سؤال واستنى الرد بس الموديل ده قدم قوي ومبقاش موجود، كتير مش قادرين يفرقوا بين أنا هفضل طول عمري أعتز بنجاحي لأن مجاش بسهولة وهفضل معتزة بشخصيتي خاصة على الشاشة لأن دي حقيقتي وكل حد بيبتدي أي نقد بكلمة المذيعة مفروض تبقى أو المفروض تعمل أو المفروض ما تعملش، بكل احترام وتقدير أحب أقوله المذيعة دي حضرتك مبقتش موجودة للأسف ومابقتش تنفع كمان”.

استكملت: “لكل مذيعة صغيرة جميلة متبعاني أو لكل بنت عايزة تبقى مذيعة أحب أقولك كوني أنتي على الشاشة حددي وجهة نظرك واقنعي بيها ضيفك علشان تقدري تطلعي بحوار حلو، اعرفي إن مش كل الناس هتحبك، بس كمان اعرفي إن ده عادي المهم أنتي عايزة توصلي إيه على الشاشة، اعرفي إن في جهلة كتير قوي هيهاجموكي لأنهم مش هيعرفوا يكونوا زيك والعين مبتحبش اللي أحسن منها، أهم حاجة كمان اعرفي أنتي شاطرة في إيه وجودي منه واعرفي نقطة ضعفك إيه وغيريها، يا مذيعات يا جمال نصيحة أخيرة حبي نفسك قوي، لأن مش عيب إنك تكوني مختلفة عن الكل وتعملي لنفسك فرام محدش يدخله، تحياتي لكل متابعيني طولت عليكم بس حسيت لأول مره إن أنا لازم أتكلم”.

الحقيقه انا معرفش ليه في ستات كتيره مضيقين من فكره اني ست بتعتز بنفسها اوي وبنجاحها وان في فرق كبير من كوني ست قويه وبحب…

تم النشر بواسطة ‏Mofida Shiha – مفيده شيحه‏ في الاثنين، ١ مارس ٢٠٢١

وردت عليها إحدى المتابعات في تعليق، وكتبت: “مفيش تعارض بين إن حضرتك تكوني مذيعة معتزة بنفسك وفخورة بيها وبين إن حضرتك تدينا فرصة نسمع أصلا الحوار! حقيقي في غلوشة بتحصل من كتر تدخلك وصوتك العالي ثقي بنفسك حقك لكن حقنا نسمع أنتم بتقولوا إيه مش صداع وخلاص”.

ردت “شيحة”: “برضو دي نظرية مش صح، لأن إحنا كستات برة لو في أي مكان أكيد هنخش على كلام بعض، لأن إحنا بنبقى كتير، ده غير إن ده أسلوب البرنامج إحنا مش برنامج عادي إحنا تلاتة ليهم وجهة نظر مختلفة، أعتقد إن صوتي العالي ده ملوش حل لأنه شخصيتي وأعتقد كمان إن إحنا مش كل الأوقات بنخش على بعض فده إحنا شايفينه عادي الحقيقية، ومش هيتغير لأنه حلو ومختلف”.