عمرو سلامة: وحيد حامد زي نجيب محفوظ

هدير عبد المنعم

أشاد المخرج عمرو سلامة، بالكاتب والسيناريست وحيد حامد وأعماله على مدار تاريخه، وذلك على إثر تكريمه في مهرجان القاهرة السينمائي الدولي في دورته الـ42.

نشر “سلامة” عبر حسابه الشخصي على موقع التواصل الاجتماعي “فيس بوك”، صورة لوحيد حامد، معلقا: “وحيد حامد، أزعم أنه أهم كاتب سيناريو في تاريخ السينما المصرية، وحيد حامد كتب لكل الوسائط، إذاعة، مسرح، تليفزيون وسينما، وكل وسيط من دول له نجاحات وعلامات فيه”.

نرشح لك: بسبب وحيد حامد.. ليلى علوي تبكي على الهواء

تابع: “وحيد حامد من القلائل -مش في مصر بس بل عالميا- اللي كتب أفلام ممتعة، ناجحة تجاريا، وفنيا على مستوى راقي، لو كان عندنا قوى تسويقية كبيرة كان زمانه حصل على أهم جوائز من أهم المهرجانات العالمية”.

أضاف: “وحيد حامد هو مؤلف وصل اسمه أنه بقى كاتب ناجح شعبيا مع الجمهور، ممكن يكتب فيلم ويكون ممثلينه ومخرجه مش من الصفوف الأولى والناس تخشه لاسم وحيد حامد، مؤلف كان قادر يصنع نجم مش يستنى نجم يصنعه”.

أردف: “وحيد حامد مش بس كاتب، وحيد حامد كمان منتج، وأنتج أفلام مهمة جدا وبسببه في مخرجين ونجوم كثير شعبيتهم اتخلقت بسبب اختياره ليهم، وحيد حامد كان عنده بصيرة وتوقعات في أفلامه لم يتوقعها سياسي أو عالم اجتماع أو حتى عالم فلك، وتحققت في الواقع كإنه كان راجع من المستقبل وشافها هناك”.

واصل: “وحيد حامد كاتب كان في جماعات إرهابية حطاه على قوائم اغتيالات ومستهدفينه أكثر من قيادات في الدولة من كثر ما أفكاره كانت أقوى من السلاح، وحيد حامد زي نجيب محفوظ كاتب محنك عرف يستغل أي سنتيميتر من هامش الحرية اللي كان موجود في كل عصر بذكاء وحنكة ودبلوماسية، علشان يعترض ويعارض بعقل وبدون صدام مباشر يعطل مسيرته، وحيد حامد كان تقدمي وعرف يدس العسل في العسل، عرف يمرر أفكار في غاية التقدمية، وعرف يشاكس مع الأفكار الشعبية المليئة بالنمطية والأحكام الأخلاقية السخيف والمزيفة، وحيد حامد كتب كل الأنواع تقريبا، ماكنش محصور في نوع واحد، كوميدي ودرامي وميلودرامي وسياسي وغيره”.

استكمل: “وحيد حامد كان مش بيشوف الزبون عايز إيه، كان الزبون ده منتج أو نجم أو جمهور أو ظروف صناعة، كان قادر يعمل اللي هو عايزه وكل من سبق برضه تقبل عليه، وحيد حامد كتب أكثر من ثمانين عمل! يعني مش بس جودة، لأ غزارة مرعبة في الإنتاج”.

اختتم: “وحيد حامد أنجب مروان حامد واحد من أهم المخرجين في تاريخ الصناعة ولسه قدامه تاريخ طويل هنشوف فيه كثير، كل ما الواحد بيكبر ويشتغل يعرف إن وحيد حامد مش بس كاتب مميز وخلاص، وحيد حامد هو مثال أعلى ملهم وبرضه يعقد لإنك مهما اشتغلت مش هتعمل عشر إنجازاته، ربنا يديله طول العمر”.

يذكر أن مهرجان القاهرة السينمائي الدولي في دورته الـ 42، منح جائزة الهرم الذهبي التقديرية للكاتب وحيد حامد.