كيف خرجت شائعة جزء جديد لـ "حديث الصباح والمساء"؟

في الأيام الأخيرة، تداول رواد مواقع التواصل الاجتماعي، العديد من المنشورات التي تتضمن صورة للفنان الكبير يحيى الفخراني، كتب عليها “حديث الصباح والمساء 2”.

اعتقد البعض أن الفنان الكبير يعمل حاليًا على تحضيرات الجزء الثاني من المسلسل الذي أحبه الكثيرين منذ عرض أولى حلقاته قبل سنوات عديدة، إلا أن الحقيقة عكس ذلك تمامًا.

نرشح لك: بسبب “الملك لير”.. يحيى الفخراني عن فاروق الفيشاوي: خلاني بين نارين

يوم 19 أكتوبر الجاري، نشرت صفحة “فن الحوار في السينما والدراما”، منشورًا أكدت من خلاله أن فكرة إنتاج جزء ثان من المسلسل كانت تتردد بين الحين والآخر قبل فترة، إلا أن القائمين على المسلسل تراجعوا عن الفكرة.

وقرر القائمين على الصفحة إطلاق مسابقة تخيلية لاختيار الممثلين المناسبين لشخصيات المسلسل، الذي تمنوا أن يتم إنتاجه حقًا.

وجاء نص المنشور كالآتي: “البوست ده موجّه لمحبي المسلسل.. أصدقاء بيدج فن الحوار في السينما والدراما، الغاليين عندي بالاوي.. من يومين نزلت بوست عن حديث الصباح والمساء، والحقيقة أنا لاحظت إن الناس اللي بتحب المسلسل ده كتيير أوي، مش لوحدي يعني، وأثناء الكومنتات مع أحد فانز الصفحة اتكلمنا عن الجزء التاني للمسلسل، صحيح أنا سمعت كلام عن إنتاج الجزء الثاني في فبراير الماضي، بس من ساعتها لا حس ولا خبر، لقيت لينك خبر بيقول إن المسلسل مش هيتعمل”.

تابع: “الحقيقة أنا كنت واحد من ناس كتير مش حابين يتعمل من المسلسل ده جزء تاني، و ده عشان خايفين يعملو الجزء التاني مشوّه، لكن لما فكرت كويس لقيت إن المسلسل ده عشان يطلع بشكل لائق لابد من ممثلين وسيناريو وحوار وإخراج علي مستوي المسلسل وقيمته عند الناس، متهيألي من حقنا نشارك ونقول رأينا في عمل درامي يمثل شيء كبير في وجداننا كلنا ومينفعش يطلع بصورة تصدمنا، كلنا خايفين يتعمل جزء تاني أي كلام”.

أضاف: “اكتشفنا أنا والصديق اللي اتكلمت معاه في الكومنتس، إن مش أي حد ينفع يكتب المسلسل ده ولا أي حد ينفع يعمل دور أقل دور في الجزء التاني، فجتني فكرة مجنونة: ليه لاء احنا بيدج على الفيس ومتابعينا كتير الحمد لله، بقول ليه لاء منعملش حاجة زي حملة ع الفيس وتويتر نطالب فيها إنتاج الجزء الثاني من مسلسل حديث الصباح والمساء، هنختار الممثلين سوا، وهنختار المؤلف والمخرج، ونعمل دا تحت هاشتاج: حديث الصباح والمساء 2”.

استكمل: “واللي يعرف يمنشن للممثلين أو المخرجين أو المؤلفين اللي يختارهم يا ريت، ممكن كمان فنانين الجرافيك أو الفوتوشوب من أصدقاء الصفحة أو من علي الفيس عموما يجيبو صور لممثلين وكأنهم أبطال الجزء الثاني، زي بوسترات مثلا، ممكن أي فنان مهتم في أي مجال فني رسم أو تصوير أو موسيقي أو أي مجال فني يبدع معانا بشغله في الموضوع ده”.

تابعت: “طبعا المسلسل يقدر يستوعب عدد كبير من النجوم زي الجزء الأول…وعشان كده تقدروا تقترحو أي عدد من الممثلين أو المؤلفين أو المخرحين، عن نفسي هبدأ أحدد على الأقل أهم النجوم وكمان السيناريست والمخرج.، في الكومنتات اكتبو اللي تحبوه من الممثلين، ولو منشن لناس من صنّاع الدراما يبقى تمام أوي، هي فكرة، مجرد فكرة، نفعت كان بها، منفعتش مخسرناش حاجة”.

اختتمت: “مش مهم إزاي النجوم دي تجتمع أو إن الإنتاج هيبقى مكلف أو لاء، حنا نختار براحتنا بغض النظر عن أي اعتبارات إنتاجية أو غيرها…نختار بخيالنا حتى لو صعب يحصل في الواقع، نطلق العنان لخيالنا، لأن في الأول وفي الآخر المسلسل معمول للناس، فـ من حقهم يختارو بخيالهم على الأقل، تخيل كدة مين تحبه يكون في الجزء التاني من المسلسل التاريخي ده، حلم وممكن يتحقق.. اعملو شير للبوست علي أوسع نطاق”.

 

يشار إلى أن مسلسل “حديث الصباح والمساء” عرض لأول مرة عام 2001، وهو بطولة مجموعة كبيرة من النجوم من بينهم ليلى علوي، أحمد خليل، دلال عبد العزيز، أحمد زاهر، حنان مطاوع، سلوى خطاب، عبلة كامل، محمد نجاتي، أميرة العايدي، علا غانم، منة شلبي، أحمد ماهر، سوسن بدر، توفيق عبد الحميد، محمود الجندي، أحمد رزق، خالد النبوي، إبراهيم يسري، وغيرهم الكثيرين، ومن إخراج أحمد صقر، وقصة نجيب محفوظ، وسيناريو محسن زايد.