بسبب أزمة البيكيني والبوركيني.. دعاء فاروق تهدد متابعيها بالبلوك

أبدت الإعلامية دعاء فاروق استياءها من بعض التعليقات السلبية من بعض متابعيها، بسبب دعمها لحرية الفتيات والنساء في ارتداء ما يخترن على البحر وداخل حمامات السباحة، سواء كان بيكيني أو بوركيني، وهي الأزمة التي ظهرت خلال اليومين الماضيين عبر السوشيال ميديا ما بين مؤيد ومعارض.

نرشح لك: دعاء فاروق عن نزول مربيات الأطفال لحمام السباحة: باعتبره زكاة

 

كتبت فاروق منشورا على صفحتها الرسمية عبر موقع فيسبوك: “يا اخواننا الجماعة اللي اتصدموا فيا ييجوا عاليمين والشلة اللي انا نزلت من نظرهم تعالوا شمال من فضلكم.. أما الاخوة اللي حاسين إني مدعية ويا خسارة البرامج الدينية فيا وكدهون عشان بروح الساحل ومش بضرب الناس اللي لابسين مايوهات عريانة قلمين علي سداغهم.. حضرتك ممكن تاخد تاكسي وعلي أي صفحة تانية جمبينا… فسحوا كده شوية بقي وسيبولي شوية الناس اللي شبهي نبلبط مع بعضينا هنا في الأناية اللي في الصفحة”.

أضافت: “التعليق اللي مش هيعجبني بلوك من غير نقاش.. أنا اصلا مش عاوزة تعليقات عشان مصدعة وهنام، ومفيش تصبحوا علي خير”.

الجدير بالذكر أن دعاء فاروق كانت قد علقت على الجدل الذي أثير مؤخرًا، بسبب انتقاد البعض ارتداء المحجبات للبوركيني في بعض الأماكن السياحية.

نشرت “فاروق” تدوينة عبر حسابها الشخصي على موقع “فيسبوك” جاء نصها كالآتي: “احنا في الساحل الشمالي في بلومار القرية المملوكة لصاحب وادي دجلة ماجد سامي، وهو مسيحي الديانة، ولا كان يفرق معايا ديانته نهائي لكني مضطرة أقول كده لأن المكان خليط بين المسلمين والمسيحيين الوحدات ملخبطة متعرفش مين مسلم ومين مسيحي غير لو اطلعت على الأسماء وطبعا المحجبات معروفين، الجنايني وبتوع الصيانة والأمن اسمهم جورج وعادل وجوزيف”.

تابعت: “البنات بالبكيني على البحر والشباب أحيانا بالبيرة واحنا بنكون في الشمسية اللي جنبهم لا هم بيستعروا مننا على أساس إن احنا بقينا عار بالنسبة لبعض المرضى، ولا احنا متضايقين أبدا من وجودنا جنب بعض، الناس لطيفة بشكل يفرح، الراجل المسيحي باع الوحدات للمحجبات عادى ومفيش أي حمام سباحة ممنوع فيه النزول بالمايوه المقفول أبدا، مش بحب اسمي المايوه لا شرعي ولا بوركيني هو مايوه مقفول وخلاص، لا بقول عليه شرعي ولا عرفي هو مايوه بيغطي الجسم فقط ولا يمكن أي واحدة تقدر تقعد بيه في الشمس لأنها هتفطس من الحر لازم تنزل الماية عشان تستحمله”.

أضافت: “اللطيف بقي إني شفت ست منقبة قاعدة عالشط أم لبنات وأولاد فيه منهم محجبات وفيه منهم غير محجبات وجنبنا البنات بالبيكيني وحاجة في منتهي الرقي اللي في الدنيا، محدش بيبص على حد أصلا .. لا بتعالي ولا باحتقار ولا بتلصص ولا بأي طريقة، الناس مستمتعين بالبحر وحمامات السباحة مع أهلهم وأصحابهم، بمناسبة الواقعة العجيبة اللي حصلت في مكان ما في الساحل مش متأكده من اسمه، ومش فارق معايا الأسماء المهم التصرفات التي تصدر من ناس بيقولوا على نفسهم انهم شيك وكلاسي وكده”.