بعد تزايد مصابي كورونا.. محمد على خير يحذر: مبقاش في سرير فاضي
حذر الإعلامي محمد علي خير، الجمهور من خطورة الاستهانة بالإجراءات الوقائية التي نادت وزارة الصحة مؤخرًا، بضرورة اتباعها لتفادي الإصابة بفيروس كورونا، خاصة في ظل التزايد المستمر لأعداد المصابين بالفيروس.
نرشح لك: بسبب البهاق.. رامي جمال ينفعل على متابع: لسانكم أصعب فيروس
نشر خير، عبر حسابه الشخصي على موقع “فيسبوك” منشورًا كُتب فيه: “إنذار.. شوف قريبا والله أعلم احنا دخلنا المرحلة التالتة في انتشار فيروس كورونا في بلدنا وأعداد الإصابة في حالة تزايد كبيرة، تفوق طاقة المنظومة الصحية ومفيش سرير فاضي في مستشفى حكومي أو خاص، وعزل المريض أصبح في بيته”.
تابع: “ياريت أنا وحضرتك نرجع للي عملناه أول أسبوع كورونا عندنا ونمشي عليه، ومتفرحشي إن الحكومة هترفع الحظر وترجع الحياة بالتدريج، عمل حظر على نفسك شهر كمان باتباع الآتي، وأرجوك وأتوسل إليك اسمعني لأن الدنيا مش حلوة خالص ومفيش حد هيسمع لك أعمل الآتي لمدة شهر”.
أردف: “هتروح شغلك وبالكمامة وخلص شغلك اللي بقي ٣ أيام بس وروح بيتك بالكمامة في المواصلات، بلاش نزول أسواق ومولات أقعد في بيتك، بلاش الجامع حتي لو اتفتح وصلي جماعة بأهل بيتك، لا تزور أحد في بيته ولا تستقبل ضيوف، اتبع تعليمات الأطباء في تقوية جهاز المناعة، غسل اليدين بشكل مستمر حد أدني ٢٠ ث، عارف انك مخنوق زي حالاتي، بس سرير بيتك أحلي مليون مرة من سرير المستشفى”.
أضاف: “تذكر الجملة دي، مفيش سرير فاضي في أي مستشفي، حتي لو كنت مليونير، لو وقعت محدش هيسمعك أو يسمي عليك..لحد دلوقتي ما اخترعوش علاج للكورونا ولا مصل للوقاية في مصر، احنا دخلنا مرحلة الانتشار السريع ناس بسيطة اتصلوا بي عشان ألاقي سرير لمصاب كورونا عندهم في البداية كنت بنجح بفضل الله في توصيل الحالة للمسؤولين منذ أكتر من أسبوع مبقاش فيه سرير فاضي، اللهم الطف بنا..اللهم امين”.