9 أسئلة وأجوبة عن تداعيات تحرير سعر الصرف - E3lam.Com
نشر الكاتب الصحفي رامي إبراهيم المراسل السابق لقناة cnbc عربية، وعدد من المجلات الاقتصادية المتخصصة إجابات لأبرز 9 أسئلة حول تحرير سعر الصرف.
إعلام دوت أورج ينشر الأسئلة والإجابات التي قدمها الصحفي الاقتصادي القدير.
س- قرار البنك المركزي بتحرير سعر الصرف معناه ايه بالظبط؟
ج- معناه التعويم الكامل للجنيه بمعنى إنه خلاص مافيش حاجة اسمها سعر رسمي، كل بنك وكل شركة صرافة من حقه يحدد سعر الشراء وسعر البيع ويعلنه على اللوحة وينفذ التداول به.
س- معنى كدة انه حيكون السعر متفاوت من مكان لآخر؟
ج- زي أي حاجة في الدنيا بيكون فيه تفاوت محدود، وكمان متوقع يكون فيه نوع من الاتفاقات بين البنوك في الأول لتحديد السعر لكن قوى العرض والطلب في النهاية حتتولى تصحيح السوق
س- طيب وده تأثيره إيه على سعر الجنيه؟
ج- سعر صرف الجنيه كان بيخضع لعامل رئيسي لسه مستمر هو انخفاض عائدات الدولة من العملات الأجنبية وعامل ثانوي هو المضاربات اللي متوقع دلوقتي تختفي أو على الأقل تنخفض جداً وبالتالي حيكون سعر الصرف معبر عن الحجم الحقيقي لقوى العرض والطلب وده طبعا بعد ما نوصل لمرحلة استقرار السوق، يعني مافيش حجة بعد كدة للكلام عن المؤامرات والخرافات دي، الحكاية ببساطة ان الجنيه كان لازم ينزل الفترة اللي فاتت لكن مش للدرجة اللي وصل لها في السوق السوداء.
س- يعني قرار التعويم مفيد مش سىء زي ما الناس خايفة؟
ج- هو قرار إجباري بصرف النظر عن تأثيره في الحقيقة ما فيش خيار تاني، مش لازم ننسى أن صندوق النقد بيشترط توحيد سعر الصرف يعني ما يكونش فيه سوق سوداء، والبديل اللي هو تخفيض قيمة الجنيه رسمياً مالوش معنى لأن حجم التعاملات خارج البنوك أضعاف حجم التعامل الرسمي بمعنى ان سعر البنوك سواء كان طلع أو نزل مابقاش له قيمة فكان التعويم هو المخرج الوحيد. طبعاً الكلام ده مالوش علاقة بتقييم ومحاسبة السياسات والأشخاص اللي وصلونا للوضع ده. لكن رأيي – وممكن أكون غلطان – انه حاليا ده المخرج الوحيد من أسوأ أزمة إقتصادية مرت بمصر في العصر الحديث.
س- لكن سعر الدولار كان نزل يوم الأربعاء .. ليه بقى نعوم الجنيه؟
ج- طيب ده موضوع مهم خلينا نتكلم فيه باستفاضة شوية. اللي حصل يوم الأربعاء مش جديد ولا أول مرة يحصل دي ثالث مرة السنة دي، حصل لما الدولار تجاوز 10 جنيهات وحصل لما الدولار تجاوز 13 جنيه وفي المرتين استمر السعر المرتفع ايام قليلة جدا وبعدها نزل فجأة ثم عاود الارتفاع ببطء لغاية ما تجاوز أعلى سعر كان وصل له وبعدها انطلق للارتفاع بسرعة عالية جدا ومادام هو ده سلوك الدولار في المرتين اللي فاتوا يبقى هو ده نفس السيناريو اللي كان حيحصل المرة دي، واحنا لما بنقول سلوك الدولار فالمقصود في الحقيقة هو سلوك المتعاملين بالبيع أو الشراء اللي ممكن نتوقع حيتصرفوا ازاي بناء على الخبرة السابقة معاهم.
في المرات الثلاثة السعر كان كسر حاجة اسمها “نقطة مقاومة” اللي هي كانت 10 و13 و17.5 وكان لما يرجع للارتفاع تاني اول نقطة شبيهة قدامه هي رقم 20 جنيه للدولار. ليه الدولار بينزل بعد ما يكسر نقطة المقاومة دي لأن كبار تجار السوق السوداء بيبيعوا الدولارات بمجرد السعر ما يتجاوزها علشان يحققوا أرباح عالية وبالتالي العرض يزيد فالسعر ينزل فيدخلوا نفس التجار يشتروا تاني يعني يبيع فوق ويشتري من تحت وده اللي اسمه “جني الأرباح” اللي بنسمعها في تقارير البورصة مثلاً.
انسوا هنا بقى أرجوكم الخزعبلات بتاعت ده شخط في الدولار نزله وده ضحك عليهم والكلام ده. في الآخر دي عملية متكررة ومفهومة. لكن المرة دي معدل نزول السعر كان أسرع وده غالبا لأن البنك المركزي أصبح أحد اللاعبين الكبار في السوق الموازية عن طريق أنه طلب من بنكين كبار يشتروا دولارات من السوق علشان يقدر يستخدمهم في الوقت المناسب الى جوار ماكينة الشائعات والأخبار المضروبة اللي يتم ترويجها لتخويف المتعاملين ودفعهم للبيع وبالتالي ينخفض السعر أكتر.
يعني البنك المركزي اختار التوقيت اللي هو عارف ان فيه كبار التجار حيبيعوا علشان يحصدوا ارباح وقرر يتدخل هو كمان علشان يدفع الدولار للتراجع اكتر ويحصل فزع عند صغار التجار ويبيعوا، وده بالتأكيد تكتيك ممتاز من البنك علشان قرار التعويم يتم والسعر مش مرتفع .. كبار التجار ما خسروش حاجة لأنهم بينفذوا القاعدة الذهبية اللي عارفها كل الحيتان “أن تبيع حين يشتري الآخرون وأن تشتري حين يبيع الآخرون” ، انما اللي خسروا يا عيني هم كالعادة صغار التجار .. الناس اللي سمعت ان فيه حاجة بتكسب اسمها الدولار فدخلوا السوق معاهم 10 الاف دولار او 5 الاف دولار او 20 الف دولار ودول طبعا بيشتروا لما يعرفوا ان الناس بتشتري ويبيعوا لما يعرفوا ان الناس بتبيع ودايما هي دي نوعية الوليمة اللي بيتغذى عليها الحيتان.
س- يعني سعر الدولار كان حيرجع يطلع تاني؟
ج- بسؤال المتعاملين تأكد أن كبار التجار كانوا بدأوا يشتروا تاني من مساء الاربعاء يعني كانوا واخدين السعر للأعلى
س- طيب ودلوقتي بعد قرار المركزي ايه اللي اتغير؟
ج- فيه قرارين مهمين مع التعويم الاول رفع سعر الفايدة على الجنيه وده كان معروف للجميع تقريبا ومنتظر وده علشان القضاء على الدولرة والناس ترجع تشعر ان الجنيه ممكن يحقق لها ربح، والتاني هو ضخ 4 مليار دولار في السوق لتخفيض السعر او على الاقل تثبيته لفترة (ممكن تبقى شهر مثلا) وبعدها الجنيه يواجه مصيره لوحده بقى.
س- ولما يوصل قرض صندوق النقد ينخفض الدولار؟
ج- لأ. الصندوق يشترط عدم استخدام فلوس القرض في التأثير على سعر الصرف.
س- طيب امتى متوقع ان الجنيه بستعيد توازنه من غير تدخل البنك المركزي وضخ دولارات من الاحتياطي؟
ج- شوف دخل الدولة من العملات الاجنبية نزل من 93 مليار دولار السنة اللي فاتت إلى 82 مليار السنة دي اللي هي العام المالي اللي انتهى في نهاية يونيو، لو عندنا رغبة وقدرة على تصحيح السياسات اللي أدت لده يبقى الوضع حيتصلح ولو مافيش يبقى مافيش.