أحمد عبد الغني يكتب: الملخص المبين لليالي رمضان الثلاثين!
1- لسه بنعمل برامج مقالب.. ولسه الناس مصدقة.. ولسه الضيوف بيمثلوا علينا.. ولسه مقدمي برامج المقالب بيستظرفوا.
2- لسه الإعلانات بتقطع المسلسلات وتنسيك كنت بتتفرج على إيه.
3- لسه إعلانات التبرع مستمرة وكأن البلد كلها قايمة على التبرعات.. وكأن كل مشاريع المستشفيات مستنية أموال الزكاة والصدقة.
4- ظاهرة هذا العام .. إعلانات الكومبوندات والشاليهات والاستفزازات الي فيها .. مابين إعلان تبرع والتاني يجيلك إعلان الكومبوند والشالية وتبقى محتار تتبرع ولا تشترى فيلا في كومبوند.
5- لسه عادل إمام بيهل علينا كل سنة هو ويسرا ومحمود عبد العزيز والفخراني.. وكأنهم اتكتبوا علينا فى رمضان زي الفول والزبادي والكنافة والقطايف.
6- محمد رمضان الأسطورة غير من نفسه السنة دي ومقلعش وورانا عضلاته.. لا ربى دقنه وبقيت موضة.
7- شركات الألبان لسه بتتحدى بعض وكل واحد بيقول إنه الزبادي نمرة واحد في مصر.. معرفش صنف نفسه على إي أساس.
8- لسه فى إعلانات مستفزة ورخمة ومحدش طايقها.. محدش هيسترجل ويمنعها ولا إيه؟؟
9- لسه طارق نور بيتاجر بصوته وبيشحت علينا وبيقولنا نشجع المنتج المصري اللي معرفش منه أي حاجة وهو كمان مابيستعملش منه أي حاجة.
10- الفنانين بيدعوا بالتبرع طب ماتبدأوا بأنفسكم ياسادة الأول.
11- لسه إعلانات شركات المحمول أحلى حاجة في رمضان وكفاية صوت أصالة.
12- لسه المسلسلات إما فكرتها مسروقة أو محروقة أو متكررة إلا قليلا .
13- لسه أفلام العيد كلها قايمة على الرقص والإسفاف والسبكي محتكر السوق كالعادة.
14- ظاهرة هذا العام التعليمية .. تسريب امتحانات الثانوية العامة ومحدش عارف يعمل حاجة.
15- مكلتش كنافة بالمانجة ومعرفش كدا صيامي مقبول ولا لا؟
16- الفنانين اللي معملوش مسلسلات عملوا إعلانات.
17- لسه مرتضى بيهدد وبيجمع سيديهات.
18- لسه الشوارع زحمة فى كل وقت.. قبل الفطار وبعده والإشارات لسه عطلانة والعسكري الغلبان واقف بيشد في شعره .
19- لسه الناس بتشتري احتياجاتها على آخر وقت.. ليلة رمضان وليلة العيد هتلاقي المحلات زحمة وكأن محدش في البيت .
20- لسه خناقة كل بيت في رمضان على الأكل وفي العيد على الكحك ولبس العيد.
21- لسه الناس بتدور على فلوس فكة جديدة.
22- البنوك زحمة موت في آخر يومين في شهر رمضان والناس بتهجم على البنوك كأن الفلوس بتاعتهم هتضيع وكأن البنوك هتقفل مش هتفتح تاني.
23- لسه الناس مش طايقة نفسها وتقولك صيام وتقولك اللهم إني صائم .
24- لسه الإفتاءات الغريبة اللي بتطلع لنا من الشيوخ مستمرة وملهاش آخر .
25- لسه الإرهاب مستمر في مصر والعراق وليبيا وتركيا وأمريكا وفرنسا وأخيرا وليس آخرا فى المدينة المنورة .
26- لسه المصريين بخير .. التبرعات بالملايين وموائد الرحمن كتير والمتطوعين كتير وشنط الخير كتير .
27- لسه التليفزيون المصري فاشل ومحدش بيتفرج عليه ولسه برامج الرغي والتوك شو شغالة ردح .. وبرامج الطبخ والموضة تكسب .
28- لسه الأهلي بيأخد الدوري بمنتهى البساطة.
29- لسه المصريين منحوسين في قرعة كأس العالم لكرة القدم .
30- لسه الغني غني ولسه الفقير فقير.. ولسه الأماني ممكنة .
نرشح لك
نجاة وزيرة مصرية من تفجير الحرم النبوي
12 صورة من انفجار الحرم النبوي
بالفيديو: أحمد الطيب يعود على هذه القناة
التفاصيل المتوقعة لنهاية مسلسل “الأسطورة”
القائمة الكاملة لنجوم مهرجان إعلام.أورج – رمضان 2016
شارك واختر.. من الممثلة الشابة الأكثر جاذبية في رمضان 2016؟ اضغط هنـــا
