تامر أمين يمنع نفسه من "الأباحة" بسبب كوبري سوهاج
سما جابر
ندد تامر أمين مقدم برنامج “الحياة اليوم”، بأداء المسئولين السيء في محافظة سوهاج بعد تعرض كوبري للتشقق والتصدع قبل أن يتم افتتاحه، قائلًا: “الموضوع دة قصة القصص وأنا ماسك لساني لأن ممكن الحديث يوصل معايا للأباحة، ولما الأباحة في الفساد وفي الإهمال توصل لكده ماتطلبوش مننا أننا مانتكلمش بأباحة”.
وأضاف أمين، خلال حلقة اليوم الخميس من برنامجه الذي يُعرض على قناة الحياة، أن هناك تراشق فى الاتهامات بين كل من المحافظة وجهاز الإسكان والتعمير وشركة حسن علام، موضحًا إن الشركة معروفة منذ سنوات وقامت بإنجاز أعمال كباري كثيرة فى مصر.
وتابع: “القصة هنا لا بد من التحقيق فيها بشفافية… ده كوبري جديد لانج، لسه ماتسلمش ولم يستخدم وانهار وتشقق والمنظر يصعب على الكافر”، مُتابعاً: “مين اللي هيشيل الفاتورة؟، الكوبري ده من ضرايبي وضرايب المواطن، مش هينفع احنا نشيلها كمواطنين، وانا عايز اعرف مين اللي أهدر فلوسي وفلوسكم”.
واختتم: “واحدة من المفاجأت اللي تم اكتشافها ان الكوبري مافيهوش خوازيق، لكن المعلومة خاطئة، الكوبري ده فيه خازوق كبير وانتوا عارفين مين اللي أخده”.
جدير بالذكر أن الكوبرى قد شهد انهيارًا بالأمس، فانتقل المحافظ، برفقة مدير أمن سوهاج، ورئيس جامعة سوهاج، وعدد من القيادات الأمنية والتنفيذية لموقع الكوبري، وتم غلق الطريق في الاتجاهين.
يذكر أن جهاز مدينة سوهاج الجديدة هو الجهة المالكة للطريق، وقد قامت شركة النصر العامة للمقاولات بتنفيذ الطريق، والكوبري تحت إشراف جهاز تعمير جنوب الصعيد.