عبد الرحيم حسن: يوم ما تشوف نفسك "نمبر 1" تبقى فاشل
أكد الفنان عبد الرحيم حسن أن الفنان لا يستطيع أن يصف نفسه بأنه "نمبر 1"، مشيرًا إلى أن الجمهور هو صاحب الحق في تحديد مكانة الفنان ونجاحه.
وقال عبد الرحيم حسن خلال لقائه ببرنامج "الستات مايعرفوش يكدبوا" المذاع على قناة CBC الذي تقدمه الاعلاميتان منى عبد الغني وايمان عز الدين : "لا يستطيع أحد، أياً كان، أن يقول أنا نمبر وان، لأن دائمًا في حد أفضل منك. لازم تحط ده قدامك، ويوم ما تشوف نفسك نمبر وان يبقى أنت فاشل، وأفشل الفاشلين".
وأضاف: "النمبر وان الحقيقي هو اللي يعترف للي قدامه إن اللي قدامه نمبر وان، لكن أنت ما تقولش على نفسك كده، خليك والناس هي اللي تقول عليك. نجومنا الكبار مين فيهم قال عن نفسه إنه نمبر وان؟ الجمهور هو اللي بيحكم".
وتابع: "ما شفناش الأستاذ عادل إمام بيقول على نفسه حاجة، ولا أم كلثوم، ولا عبد الوهاب، ولا أي حد من النجوم الكبار بيحط نفسه في مكانة معينة، الجمهور هو اللي بيحطهم فيها".
وأشار عبد الرحيم حسن إلى أن وصف الفنان لنفسه بأنه "نمبر وان" قد يضعه في موضع خلاف مع الجمهور، قائلًا: "النمبر وان هو اللي يجتمع عليه الناس كلها، والناس تقول عليه كده وما يختلفش عليه حد. لكن طالما أنا لاقي ناس بتسبني وناس بتعترض على سلوكي أو مظهري أو اللي أنا بعمله، يبقى أنا مش نمبر وان".