صابرين النجيلي تتحدث عن مشاركتها في مسلسل "اتنين غيرنا"
تحدثت الفنانة صابرين النجيلي عن كواليس مشاركتها في مسلسل "اتنين غيرنا" بطولة الفنانة دينا الشربيني والفنان آسر ياسين والذي تم عرضه في النصف الأول من رمضان 2026، مشيرة إلى أنها لم تتحمس لهذا الدور في البداية.
قالت "النجيلي" عن سبب مشاركتها في "اتنين غيرنا" خلال لقائها مع الفنانة إسعاد يونس في برنامج "صاحبة السعادة" الذي يتم عرضه عبر شاشة "dmc": "السر في المؤلفة رنا أبو الريش.. كنا في فرح منة القيعي ولقيت عزيز الشافعي ناداني وقالي رنا عايزة تتعرف عليكي".
تابعت: "فسلمت عليها قالت لي أنا بحبك ومتبعاكي وشايفة فيكي ممثلة شاطرة اوي.. وأنا مستغربة لأن مش أي حد بيعرف يشوف الفنان من كذا زاوية هو ما أظهرهاش، بس هي ذكية اوي".
أكملت: "فقالت لي أنتي مش
حابة تمثلي؟ قلت لها أنا ناوية بس مش دلوقتي، لما أؤسس (صابرين) كمطربة ممكن نشتغل كممثلة أكتر، فقالت لي لا أنا شايفه إن أنتي جاهزة وخليني أعرض عليكي حاجة وجربي، قلت لها خلاص خليني أجرب، ونسيت الموضوع".
أضافت: "بعدها فترة قصيرة لقيتها بتكلمني وفعلًا بتعرض عليا دور (وفاء)، ففي الأول خفت ومتحمستش كده، بس لما حكت لي الحدوتة كلها بتاعة وفاء.. لأن قلت هي هتطلع مساعدة فنانة مفيش دراما في في الدور، قالت لي لا ده في دراما وليها خط درامي".
أشارت: "فأول ما حكت لي على المشاهد الدرامية بينها وبين جوزها وبالأخص الضرب، أنا استفزيت إن أنا أنا عايزة أنا عايزة أعمل المشاهد دي، عايزة أشوف نفسي أصلًا بقى قبل ما أي حد يشوفني هعمل إيه، أقيم نفسي قبل الناس أصلًا".
مسلسل "اتنين غيرنا" بطولة دينا الشربيني وآسر ياسين وفدوى عابد وسحر رامي ونور إيهاب وصابرين النجيلي وأحمد حسن وهنادي مهنا وناردين فرج وصدقي صخر، من تأليف رنا أبو الريش وإخراج خالد الحلفاوي.