هاجر جميل تتحدث عن دورها كضيفة شرف في "بيبو"
تحدثت الإعلامية هاجر جميل عن دورها كضيفة شرف في مسلسل "بيبو".
قالت هاجر جميل لبرنامج "اللمة تحلى" على إذاعة شعبي إف إم مع عماد إسماعيل: "مبسوطة جدًا بتجربة الظهور في مسلسل "بيبو"، بس الحقيقة هي جت معايا بالصدفة البحتة، وماكنتش مخططة خالص إني أمثل ولا كان الموضوع في بالي، الموضوع تم عن طريق إني كنت بعمل برنامجي في رمضان "مع الحبايب" على إذاعات راديو النيل، وبستضيف ضيوف من مجالات مختلفة، ومن ضمنهم المخرج الكبير تامر محسن".
تابعت: "قبل ما نسجل قعدنا نتكلم شوية كده دردشة عادية، وفجأة عرض عليّا إني أشارك بدور صغير في مسلسل "بيبو"، بصراحة أنا استغربت جدًا، وافتكرت في الأول إن الموضوع هزار أو حاجة مش جد، خصوصًا إني كنت رايحة أعمل لقاء وبس".
استكملت: "لكن اللي حصل إنهم فعلاً تواصلوا معايا وبدأ التنفيذ، وشاركت في التصوير، وده كان بالنسبة لي مفاجأة كبيرة جدًا، يوم التصوير كان مختلف ومميز قوي ومش هنساه، خصوصًا إني كنت وسط فريق عمل كبير، ومعايا نجوم كتير في المشهد، ودي كانت تجربة جديدة عليّا تمامًا".
اختتمت: "أكيد مش هقدر أقول تفاصيل كتير علشان محرقش الأحداث، بس متحمسة جدًا الناس تشوف المشهد في الحلقة الأخيرة، مبسوطة بالتجربة وعايزة أشكر كل فريق العمل، وكمان كل زمايلي وكل حد دعمني، وإن شاء الله الدور يعجب الجمهور".
نرشح لك: جسد شخصية يوسف في "حكاية نرجس.. أبرز المعلومات عن يوسف رأفت