لوليا هشام تكشف عن أصعب مشاهدها في "أب ولكن"
تحدثت الطفلة لوليا هشام عن دورها بمسلسل "أب ولكن"، في تصريحات خاصة لبرنامج "اللمة تحلى" على إذاعة شعبي إف إم مع شيماء السباعي.
قالت إن عمرها 6 سنوات، وبدأت التمثيل وهي بعمر 5 سنوات، ووقتها كانت تشارك في إعلانات ثم دخلت مجال التمثيل.
نرشح لك: ياسمين عبد العزيز: جليلة قريبة من شخصيتي الحقيقية
تابعت: "الأدوار اللي بتتعرض عليا ماما هي اللي بتختارها معايا وبتشجعني دايمًا، وبتساعدني كمان أحفظ الكلام كويس، أنا بحب التمثيل جدًا، وبمثل كمان مع صحابي في المدرسة وبنقعد نعمل مشاهد كده ونلعب".
أوضحت: "مسلسل "أب ولكن" أنا بعمل دور نور بنت محمد فراج، وفي اللوكيشن بناديه "بيبو" وكل الناس هناك كانوا طيبين معايا جدًا وبيشجعوني، مشهد حمام السباحة كان صعب شوية علشان الجو كان ساقع، بس عملته الحمد لله وعيدناه مرتين بس، وأنا اللي نزلت المياه فعلاً، وكانوا كلهم بيشجعوني خصوصًا ماما، في مشهد تاني لما ماما في المسلسل دخلت عليا وأنا بخبي الساعة في الدرج، المشهد ده كان صعب شوية علشان كنت لازم أعيط بجد، بس أنا بحاول أركز في الكلام والموقف علشان أعرف أطلع المشهد صح".
اختتمت: "في الكواليس بحب ألعب وأتكلم مع كل الناس، وبحب أوي أتكلم مع جيسي وألعب معاها، وكمان هاجر أحمد دايمًا بتتكلم معايا وبتضحك معايا، وأنا بحبهم كلهم جدًا، بحب السوشيال ميديا وبعمل فيديوهات أغني فيها وأقلد نجوم، وناس كتير بتقولي إني شبه دنيا سمير غانم، وأنا بحبها جدًا ونفسي أقابلها وأعمل معاها فوازير، إن شاء الله يبقى في أعمال جديدة قريب، وأنا بحب التمثيل جدًا وبتمنى أفضل أعمل أدوار حلوة والناس تحبها".