طارق لطفي عن "فرصة أخيرة": الدور معقد ولا أؤمن بالشر المطلق
كشف الفنان طارق لطفي عن كواليس مشاركته في مسلسل "فرصة أخيرة" إلى جانب الفنان محمود حميدة، الذي ينافس في سباق النصف الثاني من درما رمضان 2026.
قال لطفي خلال حواره في برنامج "هليلة في 30 ليلة" تقديم كريم رمزى على ميجا إف إم: "كنت متوقع نجاح مسلسل (فرصة أخيرة) من أول ما قرأت السيناريو، وده اللى خلاني أقبله، لأنه تحدى جديد، والدور كان معقد شوية، فقولت أكيد هعرف أطلّع منه حاجة ويعجب الناس".
نرشح لك: لبنى ونس: أدوار الشر بتريحني نفسيًا!
أضاف: "الناس كانوا أكثر كرمًا في الإشادة بالمسلسل بشكل فاق توقعاتنا، وده بان فى كم الكتابات والمتابعات اللي شوفناها، والنقاد اللي اتكلموا عن العمل".
أكد: "أنا ما بعملش الشرير كشر مُطلق، ولكن بعمله كبني آدم عاش إزاي، وواجه إيه فى تاريخه، ومن هنا بنشوف البني آدم ودوافعه، مش مسألة شرير وخلاص، لأنه فى الاول وفى الأخر إنسان".
تابع: "نجاحي في رمضان الماضي خلاني اتأخرت السنة دي، وقعدت أفكر، إيه العمل اللي أنا هعمله، بس لما قريت الشخصية في مسلسل (فرصة أخيرة) حبيتها جدا".
وعن الفنان محمود حميدة، قال طارق لطفي: هو من الممثلين اللي لسه بيجتهد لحد النهارده رغم كل تاريخه ونجوميته، مش بيعتمد على اسمه وخلاص، وهو بالنسبة لي نجم في حتة تانية، وسعيد بالعمل معاه".
مسلسل "فرصة أخيرة" من بطولة محمود حميدة وطارق لطفي وندى موسى، محمود البزاوي، على الطيب، وهو قصة أمين جمال وسيناريو وحوار محمود عزت، ومن إخراج أحمد عادل سلامة.