علي جمعة: شخص أخرج زكاة بـ50 مليون دولار لعدم قدرته على عدّ أمواله!

أجاب الدكتور علي جمعة، مفتي الديار المصرية السابق، على سؤال أحد الحاضرين، جاء فيه: "في ناس بيبقوا مثلًا مشاهير ومعاهم فلوس كتير وحياتهم كويسة، وهما ولا فارق معاهم دين ولا أي حاجة؟".

أوضح "جمعة" خلال حلقة الخميس من برنامج "نور الدين والشباب": "هو في أكتر من قارون؟! ومحدش هيبلغ ثراء هؤلاء السابقين، وبالرغم من كده الغنى نعمة من نعم الله، ولكن ليست علامة على القرب كالقوة والصحة والمُلك، وكذلك المرض ليس علامة على الغضب".

أضاف: "العلامة على التقوى والقرب إلى الله هو العمل مش النعم، في مؤمنين معاهم مليارات المليارات ومؤمنين وموحدين وبعضهم كانوا يسموه (أمير القلوب)، لأن محدش طلب منه طلب إلا ونفذه.. ففي كده وفي كده".

أكد علي جمعة: "عندنا أمثلة لا نهاية لها عن ناس معاها فلوس لو لزقوها على الحيطة تعيشهم هما وأولادهم وأحفادهم 200 سنة، وفي منهم المؤمن وغير المؤمن".

كما استشهد "جمعة" في حديثه بقصة أحد رجال الأعمال الأثرياء وحرصه على إخراج الزكاة، قائلًا: "مرة واحد من بلد آخر بعتلي قالي: أنا واقع في مشكلة ومش عارف أعد الفلوس بتاعتي، ولو عديتها عشان أعرف أحسب هطلع قد إيه زكاة هاخد سنة، وكده مش هنخلص، لأن بعد السنة هعد للسنة الجاية.. وساعتها أفتينا له أنه يقدر قيمة المال ويخرج الزكاة، فأخرج 50 مليون دولار".

اختتم: "وفي اللي بندعي ربنا يهديه أو يهده، وهو اللي بيظلم الناس وبيفسد في الأرض وبيدمر ما بيعمرش.. فهذا ليس معيار للقبول أو القرب من الله".