5 تصريحات لـ ياسمين أحمد كامل مخرجة ومؤلفة "أب ولكن"

أدلت المخرجة والمؤلفة ياسمين أحمد كامل، بعدة تصريحات لبرنامج "هليلة في 30 ليلة" الذي تقدمه المذيعة مي أنور، على ميجا إف إم، عن مسلسل "أب ولكن" الذي يعرض خلال موسم رمضان الحالي.

وجاءت تصريحاتها كالآتي:

1- بقالي فترة عندي أفكار في دماغي للستات، بس قربي من إخواتي الرجالة ومشاكلهم وحياتهم خلاني أحس إن الدراما مش مركزة خالص مع الراجل ومشاكله وحياته، واللي شدني إني أعمل حاجة عنهم إني حسيت إن حقهم مهدور شوية.

2- القضية اللي بيتناولها مسلسل "أب ولكن" أنا عايشاها بشكل شخصي بقالي 5 سنين.. ماكنش فارق لي الراجل وحش ولا الست وحشة، اللي فارق لي الطفل اللي بينهم وبيتأذى في النص، وده سبب إني كتبت المسلسل.

3- المشاكل الأسرية للأسف بتأثر على الأطفال جدا، سواء في بيوت المتجوزين أو المنفصلين، وفيه أطفال بتطلع مش سوية، وعشان كده الموضوع ده مأثر جدا في نفسيتي.

4- فكرة إني أبقى مؤلفة ومخرجة العمل في نفس الوقت، ده كان ضغط كبير أوي عليا، وانا مبعرفش أعمل حاجة مالهاش ارتباط بقضية إحنا عايشينها.

5- الطفلة لوليا هشام، اللي كانت في المسلسل دي معجزة، واختياري ليها كان بعد ما عملت كاست لعدد كبير من البنات، لحد ما الموضوع صفصف عليها، ووالدتها ساعدتني في ده لأنها سوية جدا ومتعلمة المسئولية، وأتوقع لها إنها هتكون نجمة صف أول لما تكبر.